Qeveria palestineze dorëzoi në Gjykatën Penale të Hagës raportin për vdekjen nga zjarrvënia e qëllimshme të foshnjes 18 muajshe në Nablus.
Dosja që flet për terrorizmin e të vendosurve izraelitë në territoret e pushtuara u dorëzua tek prokurori Fatou Bensouda.
Ali Saeed Dawabsheh humbi jetën kur ekstremistët hebrenj i vunë zjarrin shtëpisë së tij në një fshat në afërsi të Nablusit në Bregun Perëndimor. Prindërit e tij dhe vëllai morën plagë të rënda.
Ministri i Jashtëm palestinez, Malki tha se dokumenti përfshin edhe detaje të sulmeve të ngjashme në këto territore dhe u urdhërua të përgatitej nga presidenti palestinez, Mahmud Abaz.
Një dosje e ngjashme u dërgua në Hagë në muajin qershor me fakte të krimeve të kryera përgjatë një viti nga Izraeli e ku përfshihet edhe ofensiva e vitit të shkuar në Gaza, aktiviteti për ndërtimet e paligjshme dhe problemet me të burgosurit palestinezë. /tesheshi.com/
