Po shkon edhe muaji i dytë i vitit 2016-të dhe nuk ka shenja se mund të ndodh liberalizimi i vizave për Kosovën, të paktën në gjashtë muajt e parë të këtij viti.
Por pushteti po fajëson partitë opozitare VV-në, AAK-në dhe NISMA-n se po e dëmtojnë rëndë këtë proces me veprimet që po bëjnë në Kuvend.
Ministri i Integrime Evropiane, Bekim Çollaku, tha se është për keqardhje që opozita nuk po bënë as minimumin e vet për ta ndihmuar Kosovën në përmbushjen e kritereve sa i përket liberalizimit të vizave.
“Përkundrazi, të gjitha veprimet e saj janë në kundërshtim jo vetëm me kriteret për liberalizim të vizave por dhe në kundërshtim me vetë përcaktimin tonë strategjik për integrime euroatlantike”, tha Çollaku.
Ai këto komente i bëri pas nënshkrimit të marrëveshjes me Maqedoninë në fushën e integrimit evropian.
Ndryshe, ish-shefi i Çollakut, kreu i PDK-së Hashim Thaçi, me vite të tëra ka premtuar heqjen e vizave për Kosovën, por një gjë e tillë nuk ka ndodhur edhe pse partia e tij është në pushtet që nga viti 2007-të.
Sipas asaj që thotë ministri Çollaku, i bie që premtimi i Thaçit të ketë patur si kriter bindjen se opozita do bëhet më e urtë ne sjelljën e saj, duke i hapur rrugë liberalizimit të vizave. Nëse është vërtet kështu, Thaçi, dhe përgjithësisht pushteti, duhet të bëjnë çmos që t’i lëshojnë pak pe opozitës në funksion të liberalizimit të vizave. /tesheshi.com/
