Ka vëllezër që janë miqtë më të mirë të njëri-tjetrit, por fatkeqësisht ka edhe vëllezër që nuk janë në marrëdhënie aq të mira.
Në këtë grup të dytë bëjnë pjesë edhe vëllezërit Pogba. Më i famshmi prej tyre, ylli i kombëtares franceze dhe Juventusit, Paul Pogba, këto ditë ra në konflikt me vëllain e tij të madh, 32-vjeçarin Mathias.
Edhe ai është gjithashtu futbollist, edhe pse pa klub për momentin, dhe karrierën e ka kaluar kryesisht në skuadrat e ligave më të ulëta në Angli, Francë dhe Spanjë.
Për çfarë është në të vërtetë konflikti mes dy vëllezërve? Mathias Pogba ka postuar një video në Instagram në të cilën ka njoftuar se do të zbulojë disa gjëra që kanë të bëjnë me vëllain e tij Paul, i cili u kthye në Juventus nga Manchester United këtë verë.
“Publiku francez, italian, anglez dhe spanjoll meriton të dijë disa gjëra. Në fakt, e gjithë bota, duke përfshirë tifozët e vëllait tim, Francën, Juventusin dhe sponsorët e tij. Ata duhet të kenë informacion dhe pastaj të vendosin nëse ai meriton respekt dhe dashuri nga tifozët dhe nëse ai e meriton të luajë për Juventusin dhe të jetë në kombëtaren franceze për Kupën e Botës”, tha Mathias Pogba.
Vëllai i tij Paul kaloi nga Juventusi në Old Trafford në vitin 2016 në një transferim prej 100 milionë eurosh, i cili u realizua nga superagjenti i ndjerë Mino Raiola. Në prill të këtij viti, biznesin e tij e mori përsipër ish “dora e djathtë” e të ndjerit, Rafael Pimentos, e cila shumë shpejt u quajt “femra më e fuqishme në futboll”.
“Dua të hap sytë e njerëzve për të parë se cila është e ashtuquajtura gruaja më e fuqishme në futboll, të cilën vëllai im e quan ‘mamaja e tij e dytë’. Mendoj se ajo që do të them do të shqetësojë shumë njerëz. Do të them edhe gjëra të rëndësishme për Kylian Mbappe. Shumë detaje dhe dëshmitarë do ta konfirmojnë atë që do të them. Mund të jetë shpërthyese”, tha Mathias Pogba.
Duket se ‘kërcënimet’ e tij nuk janë asgjë e re për mjedisin e vëllait të tij, ndaj Calciomercato citoi një mesazh nga ekipi ligjor i Paul, në të cilin ata thonë se pretendimet e fundit të Mathias në rrjetet sociale nuk janë surprizë.
“Ata po shtojnë më shumë kërcënime dhe përpjekje për zhvatje nga një bandë e organizuar kundër Paul Pogba. Autoritetet në Itali dhe Francë u njoftuan një muaj më parë dhe nuk do të ketë asnjë koment të mëtejshëm në lidhje me hetimin në vazhdim”, tha ekipi ligjor i Pogba-së. /tesheshi.com/
