Pas shtyrjes disa javë, dhe pas ca manovrave të koduara, dy aleatët e mazhorancës, PS-ja dhe LSI-ja, sot gjenden në momentin për të provuar se sa reale ka qenë përplasja mes tyre.
Në rendin e ditës së Kuvendit, në seancën e sotme plenare, janë dy drafte që kërkojnë 84 vota dhe që nuk mund të presin, siç ka ndodhur në seancat e shkuara, ku gjithçka u justifikua me vizitën e Edi Ramës në Hong-Kong dhe të Ilir Metës në Uashington.
Konkretisht, në rendin e ditës së seancës së sotme parlamentare janë tre drafte, dy prej të cilëve kërkojnë shumicë të cilësuar: projektligji, “Për disa shtesa dhe ndryshime në Kodin Rrugor”, dhe një shtesë në ligjin, “Për nëpunësin civil”, të ndryshuar.
Dy javë më parë u konstatua mungesa më flagrante e LSI-së, deputetët e të cilës nuk qenë të pranishëm në Kuvend, duke e përligjur këtë me një mbledhje partie. Pikërisht kjo mungesë demonstrative solli dështimin e parë të miratimit të këtyre dy ligjeve, duke dhënë një shenjë të qartë të divergjencës nga ana e partisë së Metës.
Vetëm dy ditë më parë, kreu i LSI-së dhe numri dy i kësaj partie, Ylli Manjani, kanë deklaruar hapur se nuk do t’i votojnë ndryshimet kushtetuese të përgatitura nga grupi i ekspertëve me mbështetjen e BE-së dhe SHBA-ve, dhe kanë paraqitur një draft kundërshtues pranë Komisionit të Venecias. Pikërisht drafti i LSI-së pritet ta vonojë më shumë kohën e sjelljes së konkluzioneve nga ana e juristëve më të mirë të Europës.
Nga ana tjetër, nuk ka pasur asnjë qëndrim zyrtar nga ana e Partisë Socialiste për qëndrimet e LSI-së. Pas takimit të zhvilluar te vila e Mehmet Shehut ndërmjet të mëdhenjve të PS-së dhe LSI-së, asgjë nuk ka ndodhur konkretisht. Meta kërkoi ndryshime në qeveri dhe një draft të përbashkët për reformën në drejtësi. Por nga ana e Edi Ramës është dëgjuar i njëjti refren, dhe situata është në një statukuo që paralajmëron shpërthim.
Vetë qëndrimi i njërit prej aleatëve të mazhorancës, ish-presidentit të Republikës, Bamir Topit, kundër një pakti PS-PD për ndryshimet në Kushtetutë është një tregues domethënës se brenda grupimit që qeveris vendin ka më shumë kaos e kundërshti se dakordësi.
Ndaj pikërisht paraqitja në seancë sot e deputetëve dhe votimi i mëpastajmë do të jenë prova e zjarrit. Sipas traditës, votimet lihen kryesisht gjatë orëve të darkës, pas diskutimeve maratonë.
Errësira fsheh intrigën që po përcjell lëvizja e aleatëve, që sot nuk kanë mundësi t’i ikin ndarjes së “shapit nga sheqeri”. /tesheshi.com/
