Nga Blerim Kore
Kështjella e gurtë e Gjirokastrës mbizotëron në shumicën e punimeve të saj në qëndisje me dorë. Prej 15 vitesh ajo vazhdon të punojë plot pasion dhe dëshirë dantella dhe qëndisje të ndryshme në tekstil. “Me pëlqen dantella me dorë, janë shumë të mira”, thotë qëndistarja Vjollca Mezini ndërsa me gjilpërën dhe perin e bardhë po ravijëzon format e para të qëndisjes së rradhës në tekstil.
Gjatë këtyre viteve prej duarve të saj janë zbukuruar me dhjetra shtëpi gjirokastrite. “Njerizit janë mjaft të dhënë pas punëve në qëndisjen me dorë, ndërkohë që preferojnë gjërat e bukura dhe artistike”, thotë qëndistarja gjirokastrite. “Në punimet e mia, vijon ajo, mundohem të nxjerr gjëra të reja, të artizanatit, të traditës së vendit tonë”. Të preferuara për të ngelën që nga punmet e thjeshta në qëndisje deri tek ato me motive të veçanta si qëndisja me pe të bardhë e Kalasë së Gjirokastrës, Qafës së Pazarit etj.
Më pëlqen shumë të punoj në qëndisjen me dorë, thotë ajo, sidomos të qëndis me pe profilet e shtëpive të gurta gjirokastrite apo motive të tjera artistike. Madje krahas punës së saj të përditshme, qëndistarja Vjollcë, është në kërkim të motiveve të reja për punët e saj. “Jam duke kërkuar në familjet gjirokastrite punët që realizoheshin në qëndisje këtu e 50 vjet me parë, disa si rrjeta me shkopinj dhe punime të tjera që për monetin janë lënë në harresë”, thotë ajo ndërsa plot emocion rrëmon mes disa dantellave të realizuara vite më parë nga qëndistarët gjirokastrite.
Megjithëse disi të dëmtuara nga koha, këto lloj qëndisjesh sërish nuk e kanë humbur bukurinë e dikurshme. Ndërkohë profesionin e qëndistares ajo nuk e shikon të shkëputuar nga tradita e artizantit dhe e trashëgimisë kulturore në Gjirokastër. Më pëlqen artizanati, thotë ajo, i shkon qytetit tonë në strukturën që ka, nuk dua të humbasë kjo traditë pasi në vendet e tjera e preferojnë shumë artizanatin, punën e dorës pasi e shikojnë si diçka të lidhur me historinë, me tradicionalen.
Ditët e fundit qëndistarja Vjollcë ka çelur edhe një dyqan në mjediset e Pazarit karakteristik për të tregëtuar punimet e saj në dantellë me dorë apo qëndisje të ndryshme. Në fillim punoja vetë pastaj ngaqë u hap puna dhe kisha shumë porosi fillova të afroja dhe gra të tjera të apasionuara pas qëndisjes me dorë, thotë ajo duke shtuar se kam rreth 20 gra që miren me këtë punë të cilat mbajnë familjet e tyre me këtë zanat. Madje për të çelja e dyqanit në Qafën e Pazarit është një lloj dëshire për të mbajtur gjalla traditën e punimit të qëndisjes me dore.
Këto ditë punimet e qëndistarës Vjollca Mezini kanë tërhequr vëmendjen e turistëve të ndryshmë të cilët vizitojnë Gjirokastrën. “Në disa raste ata kanë blerë si suvenir nga Gjirokastra një prej këtyre qëndisjeve”, thotë plot emocion Vjollca ndërsa nuk e fsheh kënqësinë që dantellat dhe qëndisjet e punuara prej saj tashmë do të zbukurojnë edhe shtëpitë e turistëve në vendet e ndryshme të botës. /tesheshi.com/
