Pushtimi rus i Ukrainës doli aq jopopullor sa edhe disa parlamentarë rusë vendosën të tërhiqnin mbështetjen e tyre për Kremlinin.
Duma ruse, dhoma e ulët e parlamentit rus, votoi për të njohur pavarësinë e rajoneve renegate në Ukrainën lindore dhe kësisoj, Presidenti Vladimir Putin nënshkroi projektligjin.
Vetëm dy ditë më vonë, dhoma e lartë e parlamentit rus dha dritën jeshile për dërgimin e trupave ruse “jashtë vendit”. Megjithatë, deri të enjten në mëngjes nuk ishte e qartë se Putini kishte urdhëruar një pushtim të ashpër dhe gjithëpërfshirës të të gjithë Ukrainës.
Mikhail Matveyev, një anëtar i Dumës ruse, i ka bërë thirrje tani Kremlinit që të ndalojë pushtimin.
“Duke votuar për njohjen e pavarësisë së Donetskut dhe Luhanskut, votova për paqen, jo luftën. Unë votova që Rusia të bëhet mburojë për Donbasin, jo të bombardojë Kievin”, tha Matveyev, një anëtar i Partisë Komuniste.
Një tjetër deputet, Oleg Smolin, gjithashtu komunist, tha se ishte “i tronditur” nga pushtimi dhe se i vinte keq që kaq shumë njerëz po vdisnin.
Deklaratat e tyre erdhën mes peticioneve të panumërta kundër luftës të nisura nga mësues, shkencëtarë dhe mjekë rusë. Edhe disa ekspertë miqësorë të Kremlinit kanë filluar të vënë në dyshim publikisht arsyet pse Moska ka nisur një luftë kundër një kombi sovran. /tesheshi.com/
