BE-ja, si shumica e komunitetit ndërkombëtar, mbron një zgjidhje me dy shtete – Izraelin dhe Palestinën, në mënyrë që të sigurojë paqe të qëndrueshme në një rajon të copëtuar nga një konflikt që ka zgjatur për më shumë se 70 vjet.
Dy ditë para njohjes së shtetit palestinez nga dy vende evropiane, Bashkimi Evropian (BE) po përpiqet, megjithë përçarjet e brendshme, të sigurojë një vend për “ditën pas” përfundimit të konfliktit në Rripin e Gazës, duke marrë disa nga liderët arabë në Bruksel, shkruan AFP.
Në pamundësi për të pasur një “zë më të fortë” për konfliktin e vazhdueshëm midis Izraelit dhe Hamasit, BE-ja megjithatë shpreson të luajë një rol në përcaktimin e një zgjidhjeje të qëndrueshme midis Izraelit dhe Palestinës.
Në këtë kuadër tashmë janë zhvilluar disa takime me vendet arabe të rajonit. Ndaj, këtë të hënë, ministrat e jashtëm të BE-së po takohen sërish me homologët e tyre nga Arabia Saudite, Katari, Egjipti, Emiratet e Bashkuara Arabe dhe Jordania, si dhe me sekretarin e përgjithshëm të Ligës Arabe.
BE-ja, si shumica e komunitetit ndërkombëtar, mbron një zgjidhje me dy shtete – Izraelin dhe Palestinën, në mënyrë që të sigurojë paqe të qëndrueshme në një rajon të copëtuar nga një konflikt që ka zgjatur për më shumë se 70 vjet.
Dhe për ta arritur këtë, kreu i diplomacisë evropiane, Josep Borrell, të dielën, duke pritur kryeministrin palestinez Mohamed Mustafa në Bruksel, theksoi se vetëm një qeveri e “fortë” palestineze është në gjendje të garantojë paqen.
Borrell u bëri thirrje palestinezëve të ndërmarrin reformat e nevojshme, duke përfshirë forcimin e shtetit të së drejtës dhe i bëri thirrje Izraelit t’i japë fund zgjerimit të vendbanimeve të tij, që është “në kundërshtim me ligjin ndërkombëtar”.
“Unë mendoj se një Autoritet Palestinez funksional është gjithashtu në interesin e Izraelit, sepse arritja e paqes kërkon një Autoritet Palestinez të fortë,” tha Borrell.
Evropianët kanë treguar ndarjet e tyre që nga sulmet e nisura nga lëvizja palestineze Hamas kundër Izraelit më 7 tetor.
Këto dallime janë pothuajse të pakapërcyeshme, midis vendeve si Gjermania, e cila nuk dëshiron të bëjë asgjë që mund të rrezikojë marrëdhëniet e saj me Izraelin, dhe vendeve të tjera si Spanja, e cila ka njoftuar me Irlandën se do të njohë shtetin e Palestinës.
Këto dy vende të BE-së, së bashku me Norvegjinë, njoftuan javën e kaluar se do të njohin shtetin e Palestinës nga 28 maji.
Është vetëm “drejtësi” për popullin palestinez, tha ministri i Jashtëm spanjoll Jose Manuel Albares.
Vende të tjera evropiane refuzojnë ta bëjnë këtë ose e konsiderojnë shumë herët për ta bërë këtë.
Këto ndarje shpesh penguan miratimin e deklaratave të përbashkëta në BE, ose rezultuan në tekste kompromisi me shtrirje të kufizuar.
Për shembull, gjatë samiteve evropiane dhjetorin dhe shkurtin e kaluar, asnjë tekst nuk mund të miratohej për këtë temë.
Më pas u miratuan deklaratat, por pa Hungarinë. /tesheshi.com/
