Shkencëtarët thonë se personat me pamjaftueshmëri të zemrës duhet të kontrollohen për të parë se a kanë shenja depresioni dhe duhet t’u ofrohet këshillim.
Një studim i vogël i paraqitur në European Society of Cardiology (Shoqëria Evropiane e Kardiologjisë) tregon se pacientët me depresion kanë gjasa të mëdha të vdesin brenda një viti.
Ndonëse shumë faktorë mund të ndikojnë këtu, duke përfshirë edhe seriozitetin e sëmundjes, hulumtuesit thonë se menaxhimi i depresionit është shumë i rëndësishëm.
Profesor John Cleland, udhëheqësi i këtij studimi, i cili punon në Imperial College London dhe University of Hull, e përshkruan pamjaftueshmërinë e zemrës si “epidemi moderne” e cila i ka prekur 900,000 persona nëpër tërë Britaninë e Madhe.
Mirëpo, përkundër orvatjeve për të gjetur ilaqe më të mira dhe procedura më të përmirsuara ende nuk ka shërim për këtë sëmundje. Prof. Cleland-i ka thënë për BBC-në: “Ne si specialistë të zemrës jemi deri tani përqendruar në përpjekjet për të gjetur ilaqe, pajisje dhe operacione.”
“Ato funksionojnë por jo bash ashtu si duam ne. Rrjedhimisht kemi vendosur të tërhiqemi dhe të përqendrohemi në gjërat më të rëndësishme,” ka shtuar ai.
Rrezik më i madh për vdekje?
Pamjaftueshmëria e zemrës mund të ndodhë kur muskuli i zemrës dobësohet apo ashpërsohet, duke vështirësuar kështu pompimin e gjakut nëpër trup.
Sa më shumë që përkeqësohet kjo gjendje pacientët ndihen shumë të lodhur pa frymë.
Si pjesë e një hulumtimi të vazhduar, ekipi i prof. Cleland-it i ka pyetur 96 pacientë, të cilët janë pranuar në spital me pamjaftueshmëri të zemrës, një seri pyetjesh për të vlerësuar se a ishin në depresion.
Ata të cilët kanë dhënë shenja të depresionit mesatar apo serioz kishin gjasa më të mëdha të vdisnin në 300 ditët vijuese.
Edhe pse kjo lidhje është bërë edhe më parë, shkencëtarët në përgjithësi besonin se kjo vlente vetëm për personat me depresion që ishin në gjendje më të rëndë.
Shkencëtarët e univerisitetit të Hull-it edhe pse e pranojnë se ka gjasa që depresioni të ketë ndikim këtu, thonë se ai nuk është shkaktari kryesor.
Për shembull, gjatë matjes së nivelit të hormonit NT-proBNP, hormon i cili mund të përdoret për të ndihmuar monitorimin e seriozitet të sëmundjes, ata kanë gjetur fare pak dallim mes personave me depresion serioz dhe atyre pa depresion fare.
Ka të ngjarë që faktorë të tjerë të luajnë rol të rëndësishëm gjithashtu. Shkencëtarët thonë se disa persona me depresion mund të mos ndihen të motivuar për t’i marrë hapet (tabletat) apo për të kërkuar ndihmë menjëherë.
Hulumtuesit thonë se këto pyetje, dhe të dhënat e tyre të mëhershme, duhet të hulumtohen dhe të vlerësohen në studime më të mëdha.
Në ndërkohe Julie Ward në British Heart Foundation (Fondacioni Britanik i Zemrës) ka thënë: “E dimë se depresioni është faktor i rrezikshëm për sëmundjet e zemrës dhe shpeshherë i prek personat që kanë pasur ndonjë problem të madh me zemër në jetën e tyre.”
“Çdo person që vuan nga ndonjë sëmundje e caktuar për një kohë të gjatë, siç janë sëmundjet e zemrës, duhet të kontrollohet për simptomat fizike dhe psikologjike në mënyrë të barabartë.”
“Flisni me mjekun tuaj apo specialistin e zemrës dhe diskutojini zgjidhjet e mundshme për ju,” thotë ajo.
