Teksasi dhe Oklahoma janë gjunjëzuar pas përmbytjeve të paprecedenta të ndodhura në këto vende. Deri më tani bilanci është të paktën 11 të vdekur dhe 30 të humbur.
Personat e shpallur të humbur ndodhen në një zonë të rrethuar nga lumi i Bardhë (Blanco) në zonën qendrore të shtetit. mes tyre dyshohen të jenë edhe dy familje me fëmijë nën moshën 10 vjeç. Ata kanë qenë duke kaluar fundjavën dhe po festonin Memorial Day në Wimberley, një lokalitet i famshëm turistik mes Austinit dhe san Antonios. Shtëpia në të cilën familjet me fëmijët e vegjël kanë qenë duke pushuar është shkatërruar tërësisht pasi e ka marrë rrjedha e lumit. Deri më tani, forcat e ndihmave humanitare dhe ato të shpëtimit nuk kanë gjetur asnjë gjurmë.
Rreth 200 persona janë zënë në grackë prej mbrëmjes së djeshme në Toyota Center, në Huston. Ata kanë qenë të pranishëm në këtë zonë për të marrë pjesë në play off-in e ndeshjes së basketbollit mes Houston Rockets dhe Golden State Warriors.
Forcat zjarrfikëse kanë mundur të shpëtojnë mbi 500 persona, pjesa më e madhe e të cilëve drejtues automjetesh. Sipas Rick Flangan, koordinator i forcave shpëtuese në Huston, të paktën 2500 automjete janë braktisur në rrugë, të zhytura tërësisht në ujë.
Shtëpia e Bardhë ka premtuar për ndihma dhe forca federale të shpëtimit në zonat e goditura nga koha e keqe. Skuadrat e shpëtimit kërkojnë për të gjetur viktimat edhe në kufirin me Meksikën, në Ciudad Acuna, ku mbrëmjen e djeshme një tornado shkaktoi vdekjen e 14 personave.
Parashikimet e meteorologëve nuk janë shumë optimiste dhe kanë bërë që të paralajmërohen për rreziqet e mundshme rreth 30 milionë banorë rezidentë në shtatë shtete, mes së cilave në Texas, Arkansas, Oklahoma, Kansas, Missouri, Louisiana e Mississippi. /tesheshi.com/
