Liderët e katër partive më të mëdha, Nikolla Gruevski nga VMRO-DPMNE, Ali Ahmeti nga BDI, Zoran Zaev nga LSDM dhe Menduh Thaçi nga PDSH, në një takim të përbashkët që realizuan sot, javën që po lëmë pas e kanë vlerësuar të vështirë për shtetin, ndërsa për takimin thonë së është realizuar për t`i dhënë përkrahje të përbashkët vlerave demokratike, duke përfshirë edhe të drejtën për protestë të qetë dhe pa dhunë.
“U pajtuam të vazhdojmë me dialogun për përparimin e agjendës evroatlantike për të mirën e qytetarëve”, thuhet mes tjerash në deklaratën e përbashkët pas takimit të cilin e kishin vëzhguar ambasadori amerikan Xhes Bejli dhe shefi i misionit të BE-së në Maqedoni, Aivo Orav, në mënyrë që konkluzat të artikulohen saktë nga liderët politikë, dhe për të shmangur secilin manipulim të mundshëm.
Zoran Zaev takimin e sotëm e ka parë me pesimizëm, pasi siç tha, pushteti nuk ka disponim që të zgjidhet kriza politike: “Normalizimi i shtetit është i mundur vetëm duke formuar qeveri kalimtare e cila do të përgatisë terenin për zgjedhje të lira dhe demokratike”, deklaroi Zaev pas takimit.
Vazhdimin e krizës politike e konfirmon qëndrimi kryeministrit Nikolla Gruevski, i cili i pyetur se vallë do të dorëhiqet, u përgjigj shkurt:Jo.
Vazhdimi i dialogut është caktuar për ditën e hënë.
