Kryetari i Kuvendit të Republikës së Kosovës, Kadri Veseli gjatë takimit me Rrahim Pacolli, kryesues i Delegacionit të Kosovës për bisedimet teknike me Brukselin lidhur me Kartonin e gjelbër dhe njëherësh kryetar i Shoqatave të Kompanive të Sigurimeve, u pajtuan që të ulin tarifat e pagesës për automjetet e bashkatdhetarëve nga 1 korriku, mbi 50 për qind.
Veseli dhe Pacolli biseduan rreth çështjes së lehtësirave për bashkatdhetarët tanë gjatë ardhjes në atdhe për pushimet verore. Bashkatdhetarët zakonisht fillojnë të arrijnë në vendlindje nga 1 korriku.
Në këtë kohë, kur pritet ardhja masive e bashkatdhetarëve në atdhe, do të ulen tarifat për 50 për qind. Deri më tash, pagesa për 15 ditë qëndrimi me makinë në Republikën e Kosovës ka qenë 30 euro, ndërsa për 30 ditë, pagesa ishte 41 euro.
Bashkëbiseduesit, pas diskutimeve dhe mirëkuptimit të situatës së diasporës, si dhe nevojave të respektimit të bashkatdhetarëve që kanë qenë vazhdimisht burim i zhvillimit për vendin tonë, u pajtuan që të krijohen lehtësira si vijon: nga 1 korriku 2015, pagesa për bashkatdhetarët që arrijnë me makina, për 15 ditë do të paguajnë 15 euro ndërsa për qëndrimin 30 ditor, pagesa do të jetë 20 euro.
Veseli dhe Pacolli u pajtuan që të vijojë angazhimi për heqjen e plotë të tarifës për kartonin e gjelbër dhe bashkatdhetarët të lirohen plotësisht nga këto pagesa që rëndojnë buxhetin e tyre gjatë vizitës në atdhe.
Kjo tarifë do të vijojë të aplikohet deri në arritjen e marrëveshjes me Byronë Evropiane të Sigurimeve. Diaspora ishte, është dhe vijon të mbetet burim i përkrahjes së familjeve tona dhe të stabilitetit makro dhe mikrofiskal të vendit tonë.
