Partia Demokratike ka kërkuar rikthimin e Komunave në një tjetër ndarje të mundshme territoriale.
Në amendamentin për Reformën Territoriale, për ndryshimet kushtetuese, propozon që të rikthehen Komunat dhe kërkon që të ketë një ndarje midis zonave urbane dhe rurale.
Sipas PD-së, me këtë ndarje, Bashkitë do të administrojnë zonat urbane, ndërsa komunat të përfshijnë territoret kryesisht rurale.
“1. Njësitë e qeverisjes vendore janë komunat, bashkitë dhe qarqet. Njësi të tjera të qeverisjes vendore rregullohen me ligj.
3. Komuna dhe bashkia janë njësi bazë të qeverisjes vendore. Komunat përfshijnë vetëm territore rurale, ndërsa bashkitë përfshijnë kryesisht territore urbane dhe vetëm pjesërisht territore rurale. Ato kryejnë të gjitha detyrat vetëqeverisese, me përjashtim të atyre që me ligj u jepen njësive të tjera të qeverisjes vendore”, thuhet në amendamentin e PD-së.
Ndërkohë, kryeministri Rama tha një natë më parë në një intervistë se ishte për një tjetër reformë territoriale kur të kishte dhe më pak bashki.
Pra, që tani, pa nisur negociatat, palët janë në qëndrime diametralisht të kundërta. /tesheshi.com/
