Zëdhënësi i Bashkimit Evropian, Peter Stano, ka thënë se qasja në dialogun ndërmjet Kosovës dhe Serbisë është e balancuar dhe e koordinuar me Shtetet e Bashkuara të Amerikës, si dhe se të dyja palët pritet të jenë konstruktive.
Ai përsëriti në konferencën për media se masat ndaj Kosovës janë të kthyeshme, por edhe se BE-ja, nëse të 27 anëtarët së bashku me SHBA-në e shohin se Serbia nuk kontribuon në deeskalimin e situatës në veri të Kosovës, do të vendosin masa ndaj Beogradit.
“Bashkimi Evropian ka 27 shtete anëtare me 27 parlamente dhe mijëra parlamentarë. Politika e jashtme dhe qasja e BE-së ndaj partnerëve është formuar njëzëri nga 27 shtete anëtare që përfaqësojnë qeveritë e tyre. Gjëja e fundit që bëmë për shkak të përkeqësimit të situatës në veri të Kosovës ishte vendosja e masave ndëshkuese ndaj Kosovës, për shkak të mosgatishmërisë së saj për të de-përshkallëzuar situatën”, tha Stano.
Siç tha ai, BE-ja shumë herë ka nxjerrë në pah aspekte dhe pritshmëri të ndryshme nga të dyja palët nëse duan të anëtarësohen në Union.
“Ata duhet të sillen në një mënyrë evropiane, që do të thotë në mënyrë konstruktive drejt de-përshkallëzimit. Krizat kushtojnë para dhe nuk ndihmojnë rrugën evropiane,” tha ai.
I pyetur nga gazetarët nëse Përfaqësuesi i Lartë i Bashkimit Evropian për Politikën e Jashtme dhe Sigurinë, Josep Borrell, ka marrë letrën e dërguar nga përfaqësuesit e komisioneve të politikës së jashtme të parlamenteve të disa vendeve, Stano tha se Borrell do t’i përgjigjet përmes kanaleve të duhura të komunikimit. /tesheshi.com/
