Edhe pse 26 vjet më parë do shndërrohej në “tokë të djegur” nga lufta, Kosova sot është në shumëçka përpara Shqipërisë, madje dhe në shërbimin shëndetësor.
Kështu, banorët e Bajram Currit edhe të Hasit thonë e kanë gjetur zgjidhjen për marrjen e shërbimit shëndetësor duke kaluar kufirin drejt Kosovës. Qoftë për vizita mjekësore apo edhe për ndërhyrje kirurgjikale, ata i drejtohen spitalit të Gjakovës, pasi në spitalin e Bajram Currit mungojnë shumë mjekë specialistë, si për të rriturit ashtu edhe për moshën pediatrike.
“Në Tropojë nuk ka mjek, shkojmë në Gjakovë. E kemi afër, janë doktorë të mirë”, thotë një qytetare e Bajram Currit. “Po të mos jetë shërbimi në Gjakovë, vdesim të gjithë”, thotë një i moshuar, “mbarojmë”, citohen ata nga A2CNN
Kjo situatë pranohet edhe nga vetë drejtori i spitalit të Bajram Currit, Kujtim Rexha: “U bënë disa vite që ka mungesë mjekësh, sidomos kardiologë, pediatër, renimator… Kemi kërkuar patronazhim nga Kukësi që të na vijë të paktën dy herë të muaj, por si duket edhe Kukësi ka probleme”, thotë ai.
Nga ana tjetër, spitali i Gjakovës, i cili ka jo vetëm stafin e nevojshëm me mjekë dhe specialistë, por edhe aparaturat që duhet të ketë një institucion i tillë, u ofron shërbimin falas qytetarëve nga veriu i Shqipërisë, njësoj si banorëve të Gjakovës.
“Kemi afërsisht deri në 50 pacientë ditorë, të gjitha shërbimet i marrin edhe qytetarët e Shqipërisë”, thotë Hilmi Shala, drejtor i Spitalit të Gjakovës.
E njëjta gjë ndodh dhe me banorët e Shishtavecit e fshatrave përreth në Kukës, në kufi me Opojën e Kosovës. Ata, shërbimin shëndetësor e marrin pikërisht në Dragash.
Pos këtij realiteti, edhe infrastruktura e Kosovës është më e zhvilluar se ajo e Shqipërisë, ku nuk ka rrugë rurale pa asfalt e ku vetë fshati ka jetë ende, paçka emigrimit, si dhe shërbimet bazë. /tesheshi.com/
