Parlamenti pakistanez votoi të premten për të mos iu bashkuar ndërhyrjes ushtarake në Jemen të udhëhequr nga Arabia Saudite, duke e këshilluar qeverinë të qëndrojë asnjanëse në konflikt.
Një rezolutë e njëzëshme, e miratuar pas pesë ditësh debat, e bënte të qartë këtë qëndrim me fjalët, “Parlamenti dëshiron që Pakistani ta ruajë asnjanësinë në konfliktin jemenas, për të qenë në gjendje të luajë një rol aktiv diplomatik në dhënien fund krizës.”
Por rezoluta shton se Pakistani do të jetë në mbrojtje të Arabisë Saudite nëse kërcënohet sovraniteti apo integriteti territorial i vendit arab.
Parlamenti e mori në shqyrtim çështjen pasi qeveria saudite i kërkoi Pakistanit avionë luftarakë, anije lufte e ushtarë për t’iu bashkuar koalicionit që po godet nga ajri pozicionet e husinjve në Jemen.
Duke shprehur mbështetjen e palëkundur për Arabinë Saudite, rezoluta thekson se Pakistani do të qëndrojë krah për krah me të dhe popullin e saj në çdo rast të cenimit të integritetit territorial. /tesheshi.com/
