Ndërtimi i Unazës së Vogël ka sjellë jo vetëm trafikun e rënduar në rrugët kryesore, por herë pas herë, disa zona të kryeqytetit kanë mbetur pa energji elektrike për disa orë. Operatori i Shpërndarjes së Energjisë Elektrike njofton se pjesë e këtij projekti është edhe spostimi i N/stacionit të Qendrës, ndërtuar që në vitin 1998, për lirimin e rrugës së kësaj unaze.
Drejtori i Drejtorisë Rajonale OSHEE Tiranë, Klevis Jahaj, shpjegoi se punimet janë drejt përfundimit dhe se, “brenda kësaj jave Tirana do t’i kthehet normalitetit të furnizimit me energji dhe të gjitha skemat unazore do të jenë në punë bashkë me nënstacionet e tjera”.
Me anën këtij projekti OSHEE ka pasur dy objektiva: spostimin e këtij N/stacioni në një shesh të ri zhvillimor të vënë në dispozicion nga bashkia në muajin Tetor 2016 dhe rinovimin e këtij N/stacioni sipas standardeve të reja, vendosja e pajisjeve moderne.
Ky N/stacion menaxhon rreth 30% të konsumimit të energjisë elektrike, dhe ka një peshë të konsiderueshme. Për rrjedhojë, zhvendosja e N/stacionit të Qendrës ka ulur sigurinë e furnizimit me energji elektrike, pasi ka kaluar furnizimi nga një skemë unazore në skemë radiale. OSHEE njofton se aktualisht po kryhen të gjitha testimet e mundshme, që kërkojnë kohën e nevojshme teknike, para se n/stacioni të vendoset në funksion të plotë./tesheshi.com
