Një armëpushim i cili do të zgjasë një javë, nga sot e deri më 17 korrik, u lajmërua nga OKB-ja, ndërsa popullata është në gjendje të mjerueshme e ka nevoja të ngutshme për ndihma.
Njoftimin e bëri Stephane Dujarric, zëdhënësi i OKB-së, i cili tha se, “është e domosdoshme dhe e ngutshme që ndihma humanitare të arrijë pa u penguar te tërë banorët e pambrojtur të Jemenit përmes një pauze humanitare pa kushte.”
Sipas shifrave të OKB-së, më tepër se 80 për qind e popullsisë 24 milionëshe të Jemenit ka nevojë për ndihma humanitare.
Jemeni është bërë prej muajsh arenë e luftimeve mes mbështetësve të presidentit të njohur ndërkombëtarisht, Abdurabbi Mansur Hadit, dhe husinjve, rebelëve shiitë, të cilët kontrollojnë një pjesë të mirë të vendit. Arabia Saudite dhe aleatët e saj nisën në mars sulmet ajrore ndaj husinjve, e që atëherë, po sipas OKB-së, janë vrarë mbi 5.100 njerëz, 1.528 e të cilëve janë civilë.
Një armëpushim të tillë humanitar pati dhe në maj, por i cili u shkel në vijimësi nga palët në konflikt. /tesheshi.com/
