Përkrahësit e Partisë Socialdemokrate joparlamentare, ajo që drejtohet nga Dardan Molliqaj, hodhën bomba tymuese rreth ndërtesës së qeverisë në Prishtinë, të pakënaqur me marrëveshjen e Ohrit të javës së kaluar, e cila parashikonte edhe formimin e Unionit të Komunave Serbe.
Disa qindra mbështetës të kësaj partie fillimisht organizuan një shëtitje proteste përgjatë shëtitores qendrore në Prishtinë, e më pas u mblodhën rreth ndërtesës së qeverisë.
Duke kërkuar dorëheqjen e kryeministrit të Kosovës, Albin Kurti, ata hoqën flamujt e Kosovës nga shtiza e flamurit në hyrje të ndërtesës së qeverisë dhe në vend të tyre varën flamuj të bardhë, duke treguar se, sipas tyre, Kurti është dorëzuar me arritjen e marrëveshjes në Ohër.
Më pas aktivizuan disa bomba tymuese, të cilat për një kohë të shkurtër mbuluan me tym të zi të dendur një pjesë dhe hyrjen e godinës së qeverisë.
Është kjo një formë proteste që dhe Vetëvendosje, tashmë në pushtet, e ka aplikuar në vite ndaj qeverisjeve të tjera. Tashmë ka radhën t’ja bëjnë asaj atë që ajo u ka bërë të tjerëe. Kjo dhe nga fakti se PSD-ja është një ish-Vetëvendosje e larguar nga Kurti në rrethana opozitare. Por ndryshe nga Vetëvendosja e Kurtit, nuk është aspak faktor në jetën politike të Kosovës, duke tentuar të imponohet me kësi formash anarkike, tipike të majta. /tesheshi.com/
