Nëse ndjeni se librat e shtypur nuk përshtaten më me kohën, për shkak të madhësisë së tyre, ose sepse ju tashmë dispononi disa kopje të botuara dhe nuk keni arsye se përse ti bleni ato online, tanimë ka një zgjidhje: shoqëria amerikane Amazon ka lançuar në treg një aplikacion të ri ‘Kindle Konfort’, i cili bën të mundur konvertimin e librit të shtypur në format dixhital. Kështu, ju mund ta ruani atë në kompjuterin tuaj personal ose në tablet, për ta shfletuar kur të dëshironi.
Ky aplikacion i ri i vënë në dispozicion për kompjuterat të cilat punojnë me sistemin operativ Windows 7 ose 8, lejon konvertimin e librave të shtypur ose enciklopedive në libra dixhital përmes procesit të skanimit. Më pas, kopja e këtyre librave të konvertuar tashmë në dixhital, mund të lexohet me anë të aparatit lexues elektronik Kindle të cilin e prodhon po firma Amazon.
Programi ‘Kindle Konfort’ dallon pasiqë ai ruan të gjithë përmbajtjen e librit duke përfshirë edhe shënimet e bëra me dorë, fotografitë, etj. Ky aplikacion ka një çmim simbolik prej 19 dollarësh, krahasuar me 49 dollarë që ishte çmimi fillestar. Madhësia e këtij aplikacioni nuk është më shumë se 36 MB. Kompania Amazon bën me dije se ky aplikacion për momentin është vënë në dispozicion vetëm për përdoruesit Amerikan.
Pasi aplikacioni instalohet në kompjuter, ai i ofron përdoruesit instruksionet hap pas hapi sesi libri shtypur të konvertohet në “Libër Digital”, pastaj ai ruhet në Amazon Cloud Driver for PC Cloud.
Përgatiti: Enklid PELARI
