Kryeministri turk, Ahmet Davutoglu i pranishëm në Nju Jork për asamblenë e Përgjithshme të OKB-së, u takua me djaloshin musliman që ishte arrestuar për shkak se mësuesja mendoi se ai kishte ndërtuar një bombë, e jo një orë siç ishte në të vërtetë.
Davutoglu e mirëpriti 14-vjeçarin Ahmed Mohamed në Nju Jork në një takim të organizuar nga Fondacioni Turk, që ndihmon studentët turq në Shtetet e Bashkuara.
Babai i Ahmedit, Mohamed Elhassan Mohamed, tha për agjencinë Anadolu se familja e tij ishte mirënjohëse për mbështetjen e Turqisë. “Ajo që ndodhi me djalin tim ishte dicka qesharake”, tha ai. “Akuzoni një musliman pse ai është musliman. Ne kemi nevojë të ndalet kjo islamofobi”, tha ai.
Studenti bëri edhe një selfie me kryeministrin turk dhe gruan e tij, Sare.
Ahmedi familja e të cilit është nga Sudani, kapi titujt e shtypit ndëkombëtar kur iu vunë prangat dhe iu morën shenjat e gishtërinjve nga policia më 16 Shtator pasi një orë e bërë në shtëpi prej tij u keqkuptua si bombë.
Incidenti ndodhi në një kohë që është rritur islamofobia në Amerikë dhe ka debate të gjera për liritë fetare. Arrestimi i tij u kritikua gjerësisht. Ahmed mori mesazhe mbështetjeje nga shumë personalitete përfshirë edhe presidentin Barack Obama gjatë një vizite në Shtëpinë e Bardhë. /tesheshi.com/
