Futbollistët që do të luajnë në Kupën e Botës 2026 në Shtetet e Bashkuara, Kanada dhe Meksikë mund të përballen me rreziqe serioze shëndetësore nga nxehtësia ekstreme, sipas një studimi të ri të botuar në revistën Scientific Reports.
Meqenëse stadiumet janë të përhapura në të gjithë kontinentin e Amerikës së Veriut, studimi paralajmëron se ndryshimet e rëndësishme në gjerësi, lartësi dhe klimë do të sfidojnë lojtarët dhe aftësinë e tyre për t’u “përshtatur shpejt me klimat e ndryshme lokale”.
Kupa e Botës do të mbahet nga 11 qershori deri më 19 korrik 2026, gjatë temperaturave më të larta të verës në Amerikën e Veriut.
Hulumtimi zbulon se në 10 nga 16 stadiumet ku do të luhen ndeshjet e Kupës së Botës, lojtarët ka të ngjarë të ekspozohen ndaj nxehtësisë së rrezikshme, me rrezikun më të lartë në qytetet e Teksasit, Houstonit dhe Arlingtonit dhe në Monterrey të Meksikës.
Duke përdorur të dhënat nga Shërbimi i Ndryshimeve Klimatike Copernicus, studimi simuloi klimën në çdo vend, duke përdorur Indeksin Universal të Klimës Termike (UTCI) i cili mat se si trupi i njeriut reagon ndaj kushteve të jashtme. Rezultatet sugjerojnë se disa vendndodhje mund të kenë vlera UTCI më të larta se 49.5 gradë, një shifër që përfaqëson një rrezik të konsiderueshëm të stresit të nxehtësisë.
Studimi paralajmëron se stresi më intensiv i nxehtësisë pritet mes orës 14 dhe 17, me vlerat UTCI në Arlington dhe Houston që kalojnë 50 gradë pasdite, ndërsa në Miami kulmi i goditjes nga nxehtësia pritet rreth mesditës. Kushtet e tilla ekstreme mund të çojnë në dehidrim dhe probleme shëndetësore të lidhura me nxehtësinë për lojtarët.
Studiuesit rekomandojnë rregullimin e orarit të ndeshjeve për të mbrojtur mirëqenien e lojtarëve gjatë turneve. Studimi supozoi se stadiumet nuk do të kishin ajër të kondicionuar, por stadiumet në Houston, Dallas dhe Atlanta kanë çati të hapshme dhe ajër të kondicionuar. /tesheshi.com/
