Sipas britanikes The Guardian, personi përgjegjës i dyshuar për shpërthimin vdekjeprurës në metronë e Shën Petërsburgut në Rusi është një qytetar rus i lindur në Kirgizstan.
Njoftimi vjen nga shërbimet e sigurisë së Kirgizstanit, që e identifikojnë të dyshuarin si Akbarzhon Jalilov, i lindur në vitin 1995 në qytetin Osh.
Për shpërthimin që u mori jetën 11 personave dhe plagosi 45 të tjerë, organet hetuese të Rusisë kanë deklaruar se po hetojnë për një akt terrori, pa përjashtuar dhe mundësitë e tjera.
Shpërthimi ndodhi dje në 14:30 me orën lokale, ndërsa përgjegjësinë për të nuk e ka marrë ende askush.
Një lëndë tjetër shpërthyese u gjet orë më vonë në një tjetër stacion metroje në qendër të qytetit, për çka agjencia e lajmeve Interfax tha se do të kishte shkaktuar një shpërthim akoma më të madh nëse do të ishte aktivizuar.
E njëjta agjenci lajmesh deklaroi dje se shpërthimi ishte kryer nga një kamikaz.
Presidenti Putin gjendej në Shën Petërsburg në kohën e shpërthimit. Pas fjalimit në një forum në orët e mëngjesit, ai do të takohej më vonë me presidentin bjellorus Alexander Lukashenko. /tesheshi.com/
