Një propozim i Borrell-it për Ballkanin Perëndimor

Kreu i diplomacisë evropiane, Josep Borrell, tha të hënën në mbrëmje se Bashkimi Evropian dëshiron të përfshijë Ballkanin Perëndimor në procesin e tij vendimmarrës për politikën e jashtme dhe të sigurisë përpara anëtarësimit të rajonit në BE.

Në kryesimin e takimit të ministrave të punëve të jashtme të vendeve anëtare të BE-së dhe të gjashtëshes së Ballkanit Perëndimor, ai në rrjetin X ka shkruar se “vendi i Ballkanit Perëndimor është në BE”.

“Sonte po kryesoj takimin ministror të BE-së – Ballkani Perëndimor, me gjashtë ministra nga ai rajon. Ne duam ta integrojmë rajonin në procesin tonë të vendimmarrjes edhe para anëtarësimit, duke përfshirë vendimet e politikës së jashtme dhe të sigurisë. Vendi i Ballkanit Perëndimor është në BE”, ka shkruar Borrell.

Ndër temat e takimit ministror në Bruksel janë raportet e javës së kaluar të Komisionit Evropian për vendet e rajonit – paketa e zgjerimit, pajtueshmëria me politikën e jashtme dhe të sigurisë të BE-së dhe përgatitjen e samitit të dhjetorit të BE-së dhe Ballkanit Perëndimor.

Më herët të hënën, Borrell tha se partnerët e BE-së nga Ballkani Perëndimor duhet të “koordinojnë më afër” politikën e jashtme dhe të sigurisë me BE-në.

Shefja e diplomacisë sllovene, Tanja Fajon, tha se në atë rast përfaqësuesit e Ballkanit Perëndimor mund të marrin pjesë si vëzhgues në takimet e ministrave të punëve të jashtme të anëtarëve të Unionit.

Shefi i diplomacisë evropiane deklaroi se disa vende të rajonit “nuk kanë rezultat të madh në harmonizimin me politikën e jashtme dhe sanksionet evropiane”.

Komisioneri Evropian për Zgjerim, Oliver Varhelyi, i cili po ashtu po merr pjesë në takimin në Bruksel, ka shkruar në platformën X se integrimi i Ballkanit Perëndimor në BE është një “qëllim i përbashkët” i dy palëve.

“Kjo ka të bëjë me sigurinë tonë të përbashkët, stabilitetin, prosperitetin tonë. Sigurimi i paqes në kontinentin tonë është projekti ynë i përbashkët”, tha Varhelyi.

Diplomati hungarez shkroi më herët të hënën se KE është gati të përshpejtojë integrimin e Ballkanit Perëndimor në Bashkim. /tesheshi.com/