Po e jep efektin e vet të pritshëm, negativ kuptohet, ideja kontraverse e një shteti bektashian alla Vatikan brenda territorit shqiptar, hedhur pa asnjë logjikë bindesë nga kryeministri Rama.
Duke i trajtuar bektashianët si jo sekt, siç dhe janë, porsi si fe e katërt në Shqipëri, kjo ka lënë shije diskriminimi te Ungjillorët shqiptarë, të cilët pretendojnë të jenë besimi nr. 5(!), madje dhe me kontribute në historinë e shtetformimit shqiptar(!).
“Vëllazëria Ungjillore ndihet e shqetësuar për qëndrimin që mbajti Kryeministri Z. Edi Rama në daljen e tij publike, duke u shprehur se në Republikën e Shqipërisë, janë 4 Bashkësi Fetare. Ky është rast i përsëritur nga Z. Rama, prandaj duam të sjellim në vëmendje të Kryeministrit se në Republikën e Shqipërisë janë 5 Bashkësi Fetare.
Vëllazëria Ungjillore e Shqipërisë është Komuniteti i pestë, i cili ka marrëveshje me shtetin. Dëshirojmë t’i sjellim në vëmendje se Komuniteti Ungjillor, ka luajtur një rol që në gjenezën e Shtetit Shqiptar, duke qënë promotor i arsimimit dhe ka kontributin e vet në historinë shtetformuese të Shqipërisë, kontribut, që nuk mund të aneksohet apo të anashkalohet. Gjithashtu, Komuniteti Ungjillor ka rol në përçimin e vlerave të larta të krishtërimit në Shqipëri.
Vëllazëria Ungjillore është e indinjuar për këtë diskriminim të përsëritur nga ana e Kryeministrit Z.Edi Rama, në anashkalimit të komunitetit tonë. Në emër të Vëllazërisë Ungjillore të Shqipërisë, por edhe të çdo besimtari, pjesë të bashkësisë sonë, kërkojmë në këtë rast se do të ishte e udhës një ndjesë publike për këtë qëndrim dhe duke kërkuar që ky diskriminim të mos përsëritet më, por Komuniteti Ungjillor të trajtohet njësoj e pa eklipsim, ashtu si edhe trajtohen komunitet e tjera fetare.
Vëllazëria Ungjillore e Shqipërisë”, thuhet në reagim. /tesheshi.com/
