Gjarpërinjtë helmues vrasin rreth 63,400 njerëz çdo vit, shumica në Azinë Jugore dhe veçanërisht në Indi. Megjithatë, vdekshmëria globale nga kafshimi i gjarprit ka rënë me rreth 36% që nga viti 1990, sipas një studimi të ri shkencor ndërkombëtar.
Studiuesit e Universitetit Australian James Cook, të udhëhequr nga profesori Richard Franklin, i cili bëri publikimin përkatës në revistën shkencore “Nature Communications”, nuk shpresojnë që OBSH të mundësojë përgjysmimin e numritë të vdekjeve nga gjarpërinjtë deri 2030. Kjo i atribuohet kryesisht arsimimit të pamjaftueshëm të banorëve dhe mungesës së barnave të duhura në vendet në zhvillim, veçanërisht në zonat e tyre rurale. Në fakt, për shkak të rritjes së popullsisë botërore, pritet që në shifra vdekjet vjetore nga gjarpërinjtë të rriten në mbarë botën në mbi 68,000 deri në vitin 2050.
Vdekjet më të mëdha vjetore janë regjistruar në Indi (51,100 në 2019 ose rreth 80% e totalit), Pakistan (2,070), Nigeri (1,460) dhe Republikën e Kongos (545). Në përgjithësi, rajoni më i gjerë i Azisë Jugore, nga Afganistani në Sri Lanka, është më i rrezikshmi për takimet fatale me gjarpërinjtë, i ndjekur nga Afrika Sub-Sahariane dhe Qendrore. Në Indi vdekshmëria u vlerësua në katër vdekje nga kafshimi i gjarprit për 100,000 njerëz, krahasuar me mesataren botërore prej 0,8 vdekje/100,000.
Studiuesit theksuan se mundësia e vdekjes rritet nëse ilaçet kundër helmit nuk administrohen brenda gjashtë orëve të para të kafshimit. Megjithatë, në Azinë Jugore dhe Afrikën e Veriut, shumë viktima të gjarpërinjve kërkojnë ndihmë nga shëruesit dhe magjistarët tradicionalë, ndërkohë që shpesh spitalet nuk kanë trajtimin e nevojshëm, me gjithçka që kjo mund të sjellë. /tesheshi.com/
