Vazhdon përplasja ndërmjet kreut të shtetit shqiptar dhe ministrit të Jashtëm Ditmir Bushati. Pas polemikave për emërimin e ambasadorëve dhe deklaratave kundërshtueshe ndërmjet palësh sot Presidenti i Republikës, Bujar Nishani, ka kthyer mbrapsht, për rishqyrtim në Kuvend ligjin e Këshillit të Ministrave për shërbimin e jashtëm të Republikës së Shqipërisë.
Në qëndrimin e tij kreu i shtetit argumenton se disa pika të ligjit përbëjnë rrezik për politizimin e shërbimit diplomatik dhe për promovimin e personave të pakualifikuar.
“Rregullimet ligjore të parashikuara në lidhje me shërbimin diplomatik duket se do të ndikojnë në drejtim të politizimit të diplomacisë, gjë e cila është e papranueshme për një vend që aspiron të bëhet shtet anëtar i Bashkimit Evropian.
Në ligj dhe në relacionin shoqërues të projektligjit flitet për karrierë në diplomaci, por ndërkohë ‘de facto’ ligji do të krijojë shumë hapësira që politika të promovojë persona, të cilët nuk janë pjesë e sistemit apo që të kenë një karrierë diplomatike.
Në këtë mënyrë ekziston mundësia që të fundoset e gjithë trupa e diplomatëve të karrierës dhe të krijohet një trupë e diplomatëve të rinj, që nuk kanë një karrierë diplomatike, por që i shërbejnë politikës së radhës që është në pushtet”, thotë Nishani në një njoftim për shtyp./tesheshi.com/
