Ministri i Jashtëm grek, Nikos Kotzias ka bërë me dije se xhihadistët do të dynden e do të mësyjnë në Europë në rast se ekonomia greke bie.
Kotzias i ka bërë këto deklarata gjatë një takimi informal të Ministrave të Punëve të Jashtme të BE-së, i cili u zhvillua në Riga të Letonisë. Ai nënvizoi rëndësinë gjeopolitike të Greqisë në vendet e Ballkanit dhe ato të Mesdheut.
“Do të ketë miliona emigrantë dhe mijëra xhihadistë që do të dynden në Europë në rast se ekonomia greke shembet dhe bie. Nuk do të ketë stabilitet në vendet e Ballkanit Perëndimor dhe do të theksohen problemet në Ukrainë”,- tha ministri i Jashtëm grek.
Kotzias përmendi edhe qëndrimin e Europës mbi borxhin e Greqisë. “Gjermania kërkon të na mbysë. Ju na akuzoni për shpërdorim paraje, por askush nuk mund ta mohojë atë që Greqia i ka dhënë Gjermanisë”,- tha ai.
“Ajo që ju po na bëni ne, grekëve, është racizëm politik. Është e nevojshme që për të ardhmen e Europës të gjejë një mënyrë tjetër të trajtimit të Greqisë. Kjo është një nevojë dhe domosdoshmëri gjeostrategjike”,- është shprehur ministri Nikos Kotzias gjatë takimit të sotshëm në Rigë. /tesheshi.com/
