31 gushti i këtij viti, kishte qenë dita më e gjatë e jetës së tij. Keylor Navas, portieri i Real Madridit, po bëhej gati të fluturonte drejt Anglisë për t’iu bashkuar Manchester United, në marrëveshjen që do ta transferonte De Gean në Madrid.
Por, gjërat ishin komplikuar në momentin e fundit dhe ky operacion dështoi. Tani pas disa ditëve, Navas rikthehet të kujtojë atë që ndodhi në ditën më të errët të jetës së tij, në një rrëfim për Radio Cope të Spanjës.
“Nuk acarohem lehtë, por të gjithë kemi nga një moment delikat. Unë nuk doja të largohesha nga Madridi. Por, agjenti im më tha të mbaj afër celularin. Pastaj më telefonuan dhe më thanë të bëhesha gati për fluturim. Ndërkohë, unë qëndroja në aeroport duke pritur në holl, pasi asnjëherë nuk u futa në aeroplan”, shpjegon momentet e para të asaj nate Navas.
Më vonë portieri madrilien kujton një ndër frazat më interesante të mbrëmjes.
“Mendoja se nëse zoti dëshiron që unë të largohem nga Real Madrid, do ishte më e mira për mua, por tani unë jam këtu dhe jam shumë i lumtur”.
Më pas Navas kujton momentet e vështira që i ka kaluar gjatë asaj mbrëmjeje, që dukej se nuk kishte fund.
“Ishte njëra nga ditët më të vështira të jetës sime. Kam qarë se bashku me gruan time kur e kuptova se do qëndroja në Madrid. Ankthit i erdhi fundi, por unë dhe familja ime përjetuam shumë emocione atë natë”, përfundoi Navas.
Tani, Navas ka hyrë në histori të klubit madrilien duke u bërë portieri i parë që nuk pëson gol në pesë ndeshjet e para të sezonit. Navas-it i duhen edhe disa minuta në La Liga, për ta kaluar edhe legjendën Iker Casillas, sa i përket portës së paprekur. /tesheshi.com/
