Në një vend të drejtuar nga të dobtit dhe të frikësuarit, një figurë imponuese nga e kaluara po bën hije gjithnjë e më shumë në Britaninë e Madhe. “Përpara, së Bashku”, titulli i manifestos elektorale të Theresa May, është huazuar nga fjalimi i parë i Uinston Çërçillit si kryeministër në Dhomën e Përfaqësuesve, në vitin 1940. Mbështetësit e Jeremy Corbyn pretendojnë se turmat në manifestimet e laburistëve ishin po aq të mëdha sa ato të mbledhura për bulldogun britanik. Demokratët liberalë mund të zgjedhin të vendosin një fotografi të tij në kartën e anëtarësimit të partisë – nuk ka rëndësi që Çërçilli e kaloi pjesën më të madhe të karrierës duke përfaqësuar konservatorët.
Çërçilli është thirrur në ndihmë nga të dyja palët e debatit Brexit.
Boris Johnson, sekretari i Jashtëm dhe biograf best-seller i “burrit më të madh të shtetit që ky vend ka prodhuar në 200 vjetët e fundit, në mos në çdo kohë”, ishte i mendimit se Çërçilli, padyshim, do të kishte fushatuar me të për largimin”. David Cameron vinte re se “ai debatonte në mënyrë pasionante për bashkimin e Europës Perëndimore” pas luftës së Dytë Botërore, gjë që e bënte atë palë me fushatuesit kundër Brexit. Dhe Guy Verhofstadt, pararojë në Parlamentin Europian shpallte se fushatuesit e Brexit kishin “shpërdoruar trashëgiminë e Çërçillit”.
Ky fiksim i ri reflektohet edhe në kulturën popullore, po ashtu. Së fundmi, Çërçilli është shfaqur në gjithë ekranet televizive dhe ato të kinemave më shumë se kurrë. “Sekreti i Çërçillit”, serial televiziv që u publikua në shkurt, dhe “Kurora”, seriali që debutoi në vjeshtë, fokusohen në mandatin e tij të dytë si kryeministër, nga viti 1951 deri në vitin 1955, por e kanë përdorur këtë kohë për të risjellë në konsideratë arritjen dhe lavdinë e tij e për të nënvizuar respektin që ai kishte përgjatë gjithë spektrit të ndarë politik. Sezoni i dytë i “Kurorës”, që pritet këtë vit, me gjasa do të mbulojë vdekjen e Çërçillit në vitin 1965, duke mundësuar reflektime të mëtejshme për madhështinë e tij.
“Çërçilli”, filmi më i fundit për të doli në Britani këtë qershor dhe paraqet betejat e kryeministrit ndërsa ai përleshet me komandatët aleatë ushtarakë përpara vendimit për zbarkimin e Ditës D.
Edhe pse me një tonalitet sipërfaqësor dhe lëvdues, skenari i filmit përmban xhevahirë të tillë si “Sapo shpëtova luftën!”, “Ju do jeni gjithnjë njeriu që do na udhëheqë përmes luftës”, dhe “Nuk është gjë e lehtë të jesh lider!”. Spektatorët mund të presin shumë nga këto edhe prej “Orës më të Errët”, filmi që i vendos ngjarjet në vitin 1940 dhe që pritet të shfaqet në janar të vitit të ardhshëm.
Çërçilli pa dyshim që do të thirret në ndihmë përgjatë gjithë negociatave Brexit. Por efekti mund të jenë më shumë therrës sesa energjizues. Kur dëgjoi se burri i madh i shtetit kishte ndërruar jetë , Çarls de Gol vuri në dukje: “Britania nuk do të jetë më fuqi e madhe”. Ndërsa vendi nis aventurën e një vendi të ri në botë, pa pasur një dorë të vendosur në drejtim, e vërteta e këtij komenti do të qartësohet dhimbshëm.
Përgatiti: Juli Prifti – /tesheshi.com/
