Nga Mensur Krasniqi
Ndotja e ajrit në Tetovës mbrëmë ka arritur shifra alarmante. Gjatë orëve të natës grimcat PM10 kanë arritur 996 mikrogram për metër kub apo 20 herë më shumë se pragu i lejuar. Kjo gjendje ka shkaktuar shqetësim te qytetarët, ndërsa disa nga organizatat qeveritare që merren me çështje të mjedisit kanë ftuar për bojkot të mësimit.
Drejtuesi i Shoqatës “EcoGuerrila”, Arianit Xhaferi ka bërë thirrje që fëmijët sot mos dërgohen në shkolla si pasojë ndotjes enorme. “Unë sot nuk e dërgoj djalin tim në shkollë, në vend të tij do shkoj unë. Ju bëj ftesë dhe prindërve të tjerë që kanë fëmijët në shkollën “LIRIA” që sot në ora 13:00 të vijnë para shkollës pa fëmijët dhe të takohemi me autoritetet e shkollës. Është për shëndetin e fëmijëve tanë! Presim nga komuna shpalljen e gjendjes së jashtëzakonshme”, ka shkruar Arianit Xhaferi, një nga drejtuesit e EcoGuerilla në profilin e tij në Facebook.
Thirrje të njëjtë ka bërë edhe Lëvizja “Nëna dhe fëmija”. Si ndotës kryesor të ajrit në Tetovë ekspertët dhe Instituti i shëndetësisë kanë identifikuar fabrikën “Jugohrom”, por nga ana tjetër në ndotjen e përgjithshme bën pjesë edhe prezenca e shtuar e automjeteve, sidomos atyre të vjetra.
Ndërkohë edhe specialisti i famshëm për sëmundjet e syve në Maqedoni, mjeku Bekim Tateshi, poashtu përmes një postimi në facebook ka mallkuar të gjithë politikanët në Maqedoni të cilët mbrojnë helmuesin më të madh të banorëve të Tetovës, Jugohromin. Ai thotë se të gjithë ata të cilët heshtin dhe qëndrojnë pas fabrikës Jugohromi janë të pa fe dhe vrasës.
Më poshtë e keni postimin e plotë të mjekut Tateshi në rrjetin social facebook:
“974 damlla ju rafshin! O të pa fe! O vrasës! O,…A keni ju prind, fëmi, nipër? Mëkat, gjyna…Gjumi dimëror na kaploi, fleni, fleni, kur do zgjoheni me siguri do jetë vonë, shumë vonë…”.
Ndryshe Tetova sipas statistikave të fundit ka zënë vendin e dytë në botë për nga ndotja e ajrit. Ky qytet buzë sharrit ku jetojnë mbi 200 mijë banorë shqiptarë është lënë në mëshirë të fatit, meqë autoritetet qeveritare tregohen të shurdhër për zgjidhjen e kësaj problematike. /tesheshi.com/
