Një çift gjermanësh që kanë vizituar Greqinë, i kanë dorëzuar kryebashkiakut të qytetit të Nafpilos, 875 Euro duke i deklaruar se donin t’i jepnin një shembull qeverisë së tyre që t’i paguajë Greqisë riparacionet për dëmet e shkaktuara gjatë Luftës së Dytë Botërore.
Nina Lahge, e cila punon në Gjermani me kohë të pjesëshme dhe bashkëshorti i saj pensionist, Ludvig, e kryen këtë akt simbolik duke shpjeguar se 875 Eurot që ata i dorëzuan kryebashkiakut janë shuma që duhet të paguajë çdo gjerman për Greqinë, nëse borxhi do të ndahej me 80 milionë banorët e Gjermanisë.
Ata i kërkuan falje kryebashkiakut, që gjithsesi, nuk kishin mundësi që kjo shumë të paguhej nga ata të dy. “Ne na vjen turp për arrogancën që tregon vendi ynë dhe vende të tjera ndaj Greqisë”, deklaruan bashkëshortët gjermanë para medias greke. Ata besojnë se populli grek nuk është fajtor për situatën në të cilën ndodhet vendi. “Gjermania i detyrohet Greqisë për dëmet që i ka shkaktuar gjatë Luftës së Dytë Botërore, pjesë e të cilës është edhe kredia e detyruar e marrë në vitin 1942”, – shtuan ata.
Bëhet fjalë për kredinë të cilën nazistët ia imponuan Bankës Qendrore të Greqisë për t’ia dhënë më pas Rajhut të Tretë, gjatë Luftës së Dytë Botërere, duke sjellë kësisoj rrënimin e ekonomisë greke. Kryebashkiaku i Nafpilos, Dimitri Kotsouros, tha se paratë do të jepeshin për bamirësi.
Kryeministri i majtë i vendit, Aleksis Tsipras, e ka sjellë në qendër të vëmendjes çështjen e reparacioneve të Luftës së Dytë Botërore në mesin e diskutimeve që vendi i tij po bën me Eurogrupin në lidhje me borxhin e madh të Greqisë. Pretendimi i kësaj të fundit është se Gjermania i detyrohet në para në lidhje me çështjet e luftës, por ky pretendim është refuzuar nga pjesa më e madhe e politikanëve në Berlin.
Pas dorëzimit pa kushte në vitin 1945, Gjermania nuk pranoi që të injoronte reparaconet, edhe pse në atë periudhë ishte financiarisht e falimentuar, dhe sigurisht Greqia, si edhe shumë vende të tjera, nuk kundërshtoi./tesheshi.com/
