Nga Donat Maloku
Deputetët e Kuvendit të Kosovës pas një seance maratonike dhe debati më shumë se tetë orësh, deputetët i thanë JO, themelimit të Dhomave të Specializuara.
Më meritorët që dështoi themelimi i kësaj gjykate përveç deputetëve të opozitës ishin shtatë deputetët e Partisë Demokratike të Kosovës (PDK), edhe përkundër thirrjeve të bëra nga lideri i tyre i partisë Hashim Thaçi që kjo Gjykatë të votohet.
Pas votimit, opozita u gëzua duke thënë se e rëndësishme është që nuk u themelua kjo Gjykatë, pakënaqësinë e tyre e shprehën përfaqësuesit ndërkombëtar dhe përfaqësuesit e Qeverisë.
Ndërkaq shefi i Bashkimit Evropian në Kosovë, Samuel Zhbogar, ka thënë se është i zhgënjyer me vendimin e Kuvendit të Kosovës, deputetët e së cilës nuk votuan pro themelimit të Gjykatës Speciale. “Kuvendi i Kosovës mori një vendim dhe është përgjegjësi e tyre.
Ata morën atë vendim që donin dhe unë do ta respektoj, por duhet të them se jam shumë i zhgënjyer. Do të shohim se çfarë ndodhë pastaj, nuk e di.
Kjo është ajo çfarë mund të them tani, nuk e di se çfarë do të ndodhë më tutje. Tani nuk ka më hapa nga Qeveria e Kosovës, mendoj që Kuvendi hodhi një hap që të mos merret me këtë çështje, kjo është e tëra”, tha Zbogar.
Kreu i PDK-së e zëvendëskryeministri Hashim Thaçi, ka thënë se Qeveria do ta procedojë sërish në Kuvendin e Kosovës, ndryshimet kushtetuese që i hapin rrugë themelimit të Gjykatës Speciale.
Në deklaratën e tij para gazetarëve pasi dështoi themelimi i Speciales, Thaçi tha se deputetët që votuan kundër i bënë dëm të madh shtetit.
“Ne do të procedojmë përsëri dhe unë shpresoj në guximin qytetar dhe deputetët jane për të marrë vendime në të mirë të shtetit”, ka deklaruar Thaçi.
Kryetari i AAK-së, Ramush Haradinaj, njëherit deputet i Kuvendit, e ka cilësuar arritje të madhe mos miratimin e Gjykatës Speciale nga ana e deputetëve të Kuvendit të Kosovës, pas tetë orësh diskutime.
“Kjo është një e arritje e madhe për të gjithë Kosovën. Nuk i frikësohemi themelimit të Speciales nga OKB. Me rëndësi është që Kosova nuk e miraton këtë Gjyakte.”, ka deklaruar Haradinaj.
Deputeti Fatmir Limaj, njëherit kryetari i partisë Nisma për Kosovën, pas mosthemelimit të Speciales tha se ajo që ka më së shumti rëndësi është fakti se u ruajt sovraniteti i vendit. “Më e rëndësishmja është se u ruajt sovraniteti i vendit dhe të gjitha të tjerat janë të parëndësishme”, ka thënë Limaj.
Kuvendi i Kosovës pas më shumë se tetë orë diskutimesh të nxehta të deputetëve me 75 vota për, 7 kundër dhe dy abstenime votoi kundër Speciales, derisa për kalimin e saj nevoiteshin votat e 2/3 të deputetëve.
(tesheshi.com)
