Skuadra napolitane ka bërë një ndeshje të shkëlqyer në fushën e Juventusit, të shpërblyer me një fitore 0-1, tepër të rëndësishme për të mbajtur gjallë shpresat për një trofe të shumëdëshiruar prej vitesh.
Napoli jo vetëm mori hak për atë humbje me të njëjtat shifra në fillim të dhjetorit të 2017-s, me një gol të ish-sulmuesit të tij, argjentinasit Higuain, por e zbriti në vetëm një pikë diferencën me Juventusin kryesues.
Një 90-minutësh i përsosur nga napolitanët, që patën kontrollin e topit thuajse gjatë gjithë lojës, me disa pauza të shkurtëra.
Goli do të vinte vetëm në minutën e 90-të, nga një goditje këndi, me topin të goditur fort nga Koulibaly brenda zonës juventine. Buffon do të dorëzohej pas një seri pritjesh.
Takimi mes Juventusit dhe Napolit qe i vlefshëm për javën e 34-t të kampionatit italian. Juventusi vijon të kryesojë me 85 pikë, një më shumë se Napoli i vendit të dytë.
Kur kanë mbetur dhe katër javë për të përfunduar ky sezon i Serisë A, lufta për titull bëhet kështu akoma më intriguese. Juventusi luan të shtunën e ardhshme në fushën e Interit, ndërkohë që Napoli do të ndeshet një ditë më pas në Firence me Fiorentinën. /tesheshi.com/
