“Në 500 vjet u ndërtuan katër km rrugë…”, tha Elisa Spiropali një ditë më parë, me Milaim Zekën në Zona Zero të Top News.
E tha këtë jo si ishte në temë ish-Perandoria Osmane, porse do të thoshte se Shqipëria jonë nuk paska trashëguar, sipas saj, një përvojë shtetformuese. Dhe si shpjegim, hidhet vështrimi pas, te Perandoria, si për t’ja lënë asaj kusuret e mbrapshtive të sotme shqiptare, përfshirë dhe paaftësinë për të bërë shtet. Nuk është ndonjë gjë e re, siç nuk është dhe vetëm nga njëri krah i politikës, pra mbajtja gjallë e një miti negativ mbi pesë shekujt nën një Perandori, trashëgimtare e së cilës është Turqia, aleatja më e vërtetë dhe më e sinqertë e shqiptarëve, ajo që qeverisja socialiste duhet t’i përulet për një mbështetje të jashtëzakonshme që ka marrë nga Ankaraja në një dekadë qeverisjeje. E sulmon ish-Perandorinë dhe Berisha, pasi sheh Erdoganin te ajo e ky është miku i armikut.
Por të ndalemi te Elisa, te katër kilometrat rrugë të saj në 500 vjet që nuk dihet se nga i ka marrë, se ku i ka gjetur. Nëse është fjala për rrugë me asfalt si sot, sigurisht që nuk ka asnjë kilometër, por mjaft urat e gurta që janë kudo nëpër Shqipëri, si tregues që nuk kishte gjasë që një Perandori, e cila qeveriste mijëra kilometra e miliona njerëz, të mos kishte potenciale infrastrukturore, në raport me kontekstin social dhe ekonomik të asaj kohe.
Po Gjirokastra e Berati, dy qytete në UNESCO, dy pasaporta krenari të Shqipërisë turistike, a nuk janë ato qytete tipike osmane?! Ashtu siç është Prizreni dhe ashtu siç janë plot nur ato qytete shqiptare me pazar a çarshi, dhuratë nga ajo Perandori, siç është ashtu dhe vetë shteti shqiptar. Nëse nuk do ishte për investimin Osman, në zgrip të fuqisë, duke parë se si u ishin sulur fqinjët nga veriu e nga jugu për ta gllabëruar, me ndihmën e fuqive të mëdha, vështirë se do kishte një shtet shqiptar sot, vështirë se do kishte Shqipëri. Investoi fillimisht duke nxitur formimin e Lidhjes së Prizrenit e më pas shpalljen e Pavarësisë më 1912-ën. Por këto nuk thuhen, pasi edhe nëse dihen nuk u vjen për osh të pranohen. Dhe ndaj kemi këto mufkat e Elisës, që më shumë se injorancë, janë tregues mosmirënjohjeje ndaj Turqisë sot, e cila i është bërë krah qeverisjes së saj më shumë se çdo shtet tjetër…/tesheshi.com/
