Zgjedhjet për kreun e KMSH-së, kanë shënuar të dytin “dështim” të kryeministrit Rama, pas atij me zgjedhjet për kreun e FSHF-së kohë më parë, për të rrëmbyer të dy këto institucione – pa asgjë të përbashkët me njëra-tjetrën, veç një SH-jë në ankronim, që i përngjason në tingëllim.
Në dy rastet, edhe pse legalisht ai u ka qëndruar larg proceseve – në rastin e FSHF-së madje e tha e mënyrë deklarative se as që i interesonte se kush zgjidhej – media pranë opozitës, apo njerëz pranë saj në rrjete sociale, ndërtuan fët e fet teorinë konspirative të një përpjekjeje të tij për ta futur në dorë, si njërën e si tjetrën.
Te FSHF, i ndihu kësaj teorie fakti se rival përballë Armando Dukës qe Bashkim Fino, deputet i PS-së, e krahas këtij fakti, ne betejë me Duken qe, siç vijon të jetë, edhe Erjon Braçe. Me këtë skemë, sikur lexohej qartazi se Duka qe i humbur, e se FSHF-ja i kalonte qeverisë. Me këtë teori u ndërtua e gjithë narrativa opozitare para zgjedhjeve, por që në fund gjithçka rezultoi fiasko; Duka fitoi! Pafuqi e Ramës? Çudi! Ai mu për këtë akuzohet, fuqinë e frikshme me rrëmbim e posedim pushtetesh, ndaj si mundet të rezultojë kaq i dobët një çast?!
Kështu ndodhi dhe me zgjedhjet në KMSH. Emri i Ylli Gurrës si kandidat u pa si një investim qeveritar. Në media e rrjete shpërthyen teoritë konspirative, ku një status i Berishës, tipikisht në llojin e tij ku tjetri bëhet qepaze pa asnjë vetfrenim etik –në këtë rast myftiu Gurra – e ushqeu akoma më shumë idenë fikse se Rama kërkonte të rrëmbente KMSH-në me njeriun e tij. Në fund një hiç. Bujar Spahiu fitoi me normalitet zgjedhor dhe “kandidati i qeverisë” humbi po ashtu.
Dhe, si në fabulën “hip se të vrava, zbrit se të vrava”, kryeminstri nuk ia del të vjedhë zgjedhje apo të diktojë zhvillime me pushtetin e tij. Mosdalja e llogarisë në fund, për ata që e ushqejnë dhe e ndërtojnë konspiracionin, nuk është fallsiteti i teorisë së tyre por pafuqia e kryeministrit. Sërish çudi, sepse akuzat, ndër të tjera, i referohen dhe pushtetit të tij të frikshëm.
Janë këto ndër ato mite, që zakonisht gjallojnë në mendje provinciale, si ai që ka zënë vend dhe te narrativa politike, sipas së cilës Rama ka “blerë mediat”. Me një kërkim të thjeshtë, duke marrë televizionet, gazetat dhe Web-et kryesore, rezulton se mbi 60 përqind janë me linjë editoriale anti-qeveritare.
Ka dhe një çudi tjetër; ajo pse Flamurtari nuk po bën prokopi me Ramën deputet të Vlorës! /tesheshi.com/
