Ministrat e Jashtëm të Austrisë, Kroacisë, Republikës Çeke, Greqisë, Italisë, Sllovakisë dhe Sllovenisë, të mbledhur në grupin Miqtë e Ballkanit Perëndimor, i dërguan një letër kreres së diplomacisë evropiane Kaja Kallas dhe Komisioneres për Zgjerimin Marta Kos, në të cilën thanë se është koha për përparim vendimtar në integrimin e Ballkanit Perëndimor në Bashkimin Evropian dhe përvijuan hapa konkretë për të mbështetur rajonin në rrugën e tij drejt BE-së.
“Me luftën agresive të Rusisë kundër Ukrainës dhe sfidat e tjera të sigurisë për kontinentin tonë, politika e zgjerimit, një nga mjetet më efektive gjeopolitike të BE-së, ka marrë një shtysë të re dhe të fuqishme. Në këtë kuptim, Ballkani Perëndimor do të jetë një test lakmusi gjeostrategjik për Bashkimin Evropian. Vetëm duke e integruar këtë rajon në familjen tonë të BE-së mund të sigurojmë stabilitetin dhe prosperitetin e kontinentit tonë”, thuhet në letrën e ministrave.
Ata theksuan se mbështesin plotësisht faktin që Presidentja e Komisionit Evropian Ursula von der Leyen e ngarkoi komisioneren Kos për të çuar përpara procesin e zgjerimit “në vitet e ardhshme kritike, duke u mbështetur në momentin e rikthyer” dhe për të punuar për integrimin gradual.
“Ne do të vazhdojmë të mbështesim një proces zgjerimi edhe më dinamik, të besueshëm dhe efikas. Ka ardhur koha për përparim vendimtar dhe ne do të vazhdojmë të ndihmojmë rajonin të arrijë hapat e ardhshëm thelbësorë në rrugën e tij drejt anëtarësimit në BE”, thuhet në letër.
Në këtë kuptim, ministrat kërkuan një axhendë dhe kornizë kohore të qartë për zbatimin e plotë të Planit të Rritjes dhe nxitjen e integrimit gradual në tregun e përbashkët, si dhe në politikat e tjera të BE-së, kur të plotësohen të gjitha kushtet e nevojshme.
Ata besojnë se kjo duhet të sigurojë një perspektivë të prekshme të anëtarësimit në BE dhe të prodhojë rezultate më të dukshme për qytetarët e Ballkanit Perëndimor, veçanërisht të rinjtë, si dhe të kontribuojë në forcimin e mbështetjes së tyre për BE-në.
Thellimi i angazhimit dhe bashkëpunimit
Për të përmbushur këto synime, ata inkurajojnë partnerët nga Ballkani Perëndimor që të përshpejtojnë reformat e nevojshme, të angazhohen në bashkëpunimin rajonal, të ushqejnë marrëdhënie të mira fqinjësore përmes pajtimit dhe zgjidhjes së çështjeve të hapura dhe të zbatojnë një treg të përbashkët rajonal që është një “hap drejt një treg të vetëm”.
Letra gjithashtu bën thirrje për thellimin e angazhimit dhe bashkëpunimit në politikën e përbashkët të jashtme dhe të sigurisë (CFSP), dhe sugjeron që partnerët nga Ballkani Perëndimor të ftohen në shkëmbime joformale të pikëpamjeve gjatë takimeve të Këshillit të BE-së për Punët e Jashtme dhe takimeve jozyrtare të krerëve të diplomacisë së BE-së, për të diskutuar sigurinë dhe qëndrueshmërinë e Evropës në kontekstin e sfidave globale.
Ata vlerësuan gjithashtu se BE-ja duhet t’i përgatisë qytetarët për zgjerimet e ardhshme dhe thanë se fushata e komunikimit nuk duhet të përfshijë vetëm institucionet e BE-së dhe vendet anëtare të BE-së, por edhe partnerë nga Ballkani Perëndimor. /tesheshi.com/
