Ben Blushi përcolli impresionet e para nga një vizitë në dy qytetet e shenjta islame në Arabinë Saudite, Mekë dhe Medine. Ndodhur në tokën e Islamit për një panair libri në Jeddah, ai ka përfituar nga rasti për të shkuar me aparat aty ku gëlon peligrinazhi islam i botës në çdo kohë e fiksuar portrete besimtarësh, ku ende vijon të jetë i paqartë në lidhje me raportin e muslimanit me foton.
Duke pozuar mes dy syresh në Medine, te oborri i Xhamisë së Profetit, ai shkruan:
“Ajo që më habit është mënyra si reagojnë muslimanët e Arabisë, vendit qe standartizon praktikat fetare të Islamit, kur një besimtari i drejton një aparat forografik.
Ata nuk ikin me vrap, nuk rrudhin buzët, nuk fshehin fytyrën, nuk acarohen, nuk bërtasin, nuk shajnë, nuk fyejnë dhe as kërcënojnë sic më ka ndodhur në dhjetëra raste me burra me mjekra të gjata apo gra të mbuluara në Shqipëri, të cilët e konsiderojnë kameran një armë të rrezikshme që mund tju marrë lirinë.
Cuditërisht një pjesë e muslimanëve praktikantë të Shqipërisë besojnë se Islami nuk e lejon fotografinë të cilën e quan idhujtari, pra adhurim të një imazhi tjetër, përvec Zotit”.
Por nuk është kështu siç mendon Blushi. Në daç mes muslimanësh e në daç mes jo muslimanësh, do hasësh njerëz që preferojnë ose nuk preferojnë të fotografohen për dhjetra arsye, ndonjëherë dhe të mosarsyes. Pra, askund në Islam nuk ekziston ndonjë ndalesë mbi besimtarin që nuk duhet të fotografojë apo fotografohet. Pra, muslimani hem fotografon e hem fotografohet, sipas rastit, si çdokush.
Një përgjigje Blushit, edhe paksa ta ashpër, ia jep dhe komentatori i njohur i çështjeve islame, Justinian Topulli:
“Çfarë kërkon të tregojë, se ka zbuluar atë tolerancë dhe mirësi të Islamit që bashkëkombësit e tij myslimanë, sipas tij, nuk e kanë?
Çfarë kërkon ky njeri të shpalosë publikisht vallë? Dilemat e tij ekzistenciale, ndërkohë që fantazon për një parajsë të ardhshme tokësore pa Zot dhe vuan i trishtuar të sotmen, sepse shumica e bashkëkombësve të tij këtë Zot e quajnë Allah?
Ndoshta të gjitha këto bashkë. Ndoshta asnjëra prej tyre.
Por një gjë ai duhet ta dijë mirë: myslimanët e këtij vendi e njohin mirë atë, provokimet e tij dhe urrejtjen patologjike që ai ka ndaj Islamit dhe Profetit të tij. Për këtë arsye, ata nuk duan të fotografohen me të dhe nuk pranojnë të identifikohen me një njeri si ai, sepse e respektojnë veten dhe atë që besojnë.
Ndërsa ti, Blush, si një njeri pa din e pa iman, nuk ke asnjë skrupull moral të dalësh në foto me ata myslimanë të panjohur, dashamirës siç janë mbarë myslimanët, që nuk do të pranonin kurrë të afroheshin me atë që ka përfolur nderin e Profetit të tyre, të cilin ti me ‘artin’ tënd e ke nëpërkëmbur.” /tesheshi.com/
