Ministri i Drejtësisë, Ylli Manjani ka folur ditën e sotme në lidhje me 46-vjeçarin Klement Balili, i cili akuzohet nga Partia Demokratike si kreu i një grupi kriminal që merret me trafik ndërkombëtar të lëndë narkotike.
Manjani u shpreh se ka dijeni për një hetim dhe operacion policor të disa muajve të fundit, të nisur që në muajin mars, ndërsa bëri me dije se ministri i drejtësisë ka një rol komplementar me organet e hetimit.
“Kam përcjellë gjithë porositë e nevojshme. Besoj që e gjitha kjo shkon në mënyrë zyrtare në favor të një hetimi të plotë. Publikimi i informacioneve nuk i ndihmon hetimet, ndaj jemi të rezervuar në deklarata. Operacioni është ende në hetim. Nuk e ndihmojmë çështjen duke ekspozuar çfarë dimë për të”, – tha Manjani.
I pyetur për lidhjen e Klemend Balilit me LSI- në, ministri i drejtësisë siguroi se askush nuk ka mbështetje nga politika, e aq më tepër nga LSI-ja, ndërsa bëri me dije se si një funksionar i shtetit, Balili është shkarkuar nga detyra, duke qenë se për të ka përfolje dhe akuza të rënda.
“Përshëndes Policinë e Shtetit shqiptar, të shtetit grek, organet e hetimit. Mund t’ju siguroj dhe t’jua provoj se kërkesa ime ka qenë dhe mbetet një: cilido preson, nëse ka shkelur ligjin, duhet të jetë prapa hekurave. Askush nuk ka mbështetje nga politika. LSI është parti që nuk mbron politikisht askënd, pasi nuk mendojmë se partitë politike duhet të konkurrojnë me organet e ndjekjes penale. Çdokush e ka kokën mbi shpatullat e veta dhe nuk kemi pse ti ngatërrojmë çështjet politike me ato personale”, – deklaroi ministri.
Për Baliln ai tha se është shkarkuar sot nga detyra dhe organet hetimore kanë gjithë kompetencat për të vijuar hetimin. /tesheshi.com/
