Trajneri i përfaqësueses kroate ka dhënë sot një konferencë shhtypi, ku ka shpallur listën e përkohshme të 27 lojtarëve që mendohet të luajnë në Euro 2016.
Në listën e përzgjedhësit teknik Ante Cacic figurojnë emra të të njohur futbollistësh, si Subasic, Srna, Corluka, Modric, Rakitic, Kovacic, Brozovic, Badelj, Perisic, Mandzukic e Kalinic.
Por mes tyre nuk gjendet qendërmbrojtësi i Liverpulit, Dejan Lovren. Dhe arsyeja është një grindje mes lojtarit e trajnerit dy muaj më parë. Kroacia do të luante në mars një takim miqësor ndaj Hungarisë, dhe Lovren u nxor në nxehje, për të mos u futur më pas në lojë. 26-vjeçari do të bënte komente në gjaknxehtësi e sipër ndaj trajnerit, duke çuar në një krisje të marrëdhënies mes tyre. Diçka që lojtari po e paguan tani.
“Këta janë lojtarët më të mirë që kemi në dispozicion. Të luash në ekipin kombëtar kërkon formë të mirë dhe angazhim të plotë në nivel klubi dhe në nivel ndërkombëtar,” deklaroi trajneri Antre Cacic në konferencën e shtypit.
Megjithatë, ai la të kuptonte se vendimi i tij nuk ishte i pakthyeshëm nëse Lovren ndryshonte sjellje. “Nuk i kam mbyllur derën Lovren-it. Ai mund të kthehet një ditë po qe se kupton se duhet të jetë një lojtar ekipi.”
Mbrojtësi i Liverpulit do të thoshte muajin e shkuar: “Nuk do të kërkoj ndjesë. Do të luaj në njëmbëdhjetëshen e parë ose nuk do shkoj në Europian.”
Kroacia është pjesë e grupit D në Euro 2016, së bashku me Spanjën, Çekinë dhe Turqinë. /tesheshi.com/
