Gati dy vjet pasi e kishte hedhur në oqean, një vajzë e vogël nga Shtetet e Bashkuara mori përgjigje për mesazhin e saj në shishe.
Mesazhi në shishe u zbulua në brigjet e Irlandës nga Rory Golden i cili po merrte pjesë në një sesion zhytjeje në ishujt Friar. Ai e pa shishen që notonte në sipërfaqen e ujit dhe nuk rezistoi dot pa e e marrë.
Për habinë e tij, mesazhi ishte i një vajze 11-vjeçare nga Masaçusets, që do të thotë se shishja kishte udhëtuar gati 3 mijë milje përmes Oqeanit Atlantik.
Mesazhi nuk ishte prekës, nga ato që do të përfundonin në titujt e parë të shtypit. Në të shkruhej thjesht: “Emri im është Natali, po e hedh këtë shishe nga bregu i Nantucket në gusht 2013. Nëse e gjeni, më shkruani dhe më thoni se e keni gjetur mesazhin tim. Falemnderit.”
Edhe pse kaq i thjeshtë, Golden e ndjeu veten të detyruar t’ia kthejë mesazhin vajzës. Doli që ajo dhe familja e saj kishin dhjetë vjet që dërgonin rregullisht mesazhe të tilla.
Raste të tjera mesazhesh në shishe kanë dalë në shtyp, disa prej të cilave edhe prekëse, por mesazhe të tilla të zakonshme tregojnë një prirje të njeriut të ndjehet i humbur edhe kur është mes njerëzve e jo në mes të detit, thonë ekspertët.
Mënyra e vjetër e të humburve në det që dërgonin mesazhe të dëshpëruara për t’u gjetur mund të interpretohet edhe sot, si një dëshirë e njerëzve për t’u lidhur me qënie të tjera njerëzore, me shpresën e një mesazhi surprizë. /tesheshi/
