Shqiptarët, boshnjakët dhe kroatët bëhen bashkë për të kërkuar që Mali i Zi të jetë një Republikë ku pakicat kombëtare janë popull shtetformues.
Pakicat kanë 4 deputetë që janë të domosdoshëm për qeverinë e Milo Gjukanoviçit, ndaj tre partitë janë mbledhur dhe pritet që të kërkojnë secili nga partitë një post të rëndësishëm ministror.
SHBA dhe BE kanë mbështetur krijimin e një lobi që të jetë i imunizuar nga depërtimi rus dhe që do të jetë thelbi i një qeverie properëndimore.
Ndërkaq, këto parti nuk kanë rënë dakord që të nisin bisedimet për qeverinë e re pa marrë garancinë e plotë dhe totale nga ana e krerëve të partisë fituese relative, PDS-në e Gjukanoviçit.
Por burime diplomatike bëjnë të ditur se pritet që shqiptarët, boshnjakët e kroatët të marrin tre nga postet kyçe të qeverisë së re.
Në takimin e mbajtur në Podgoricë, krerët e koalicionit “Shqiptarët të Vendosur”, Partisë Boshnjake dhe Iniciativës Qytetare Kroate, kanë rënë dakord për një platformë të përbashkët e cila do të përmbajë kërkesat politike në përputhje me programet dhe parimet e tyre politike.
Në takim u arrit marrëveshja për krijimin e një grupi të përbashkët punues i cili në ditët në vijiim do të punojë për hartimin e një platforme të përbashkët të partive të pakicave në Mal të Zi. Krahas Platformës, secila parti apo koalicion do të punojë në përcaktimin e dokumenteve të veçanta të cilë do të përmbajnë kërkesat specifike politike të secilit prej tyre, si pjesë integrale e këtij procesi.
Vetëm pas definimit të këtyre dokumente të përbashkëta dhe të veçanta, përfaqësuesit e partive do të fillojë procesin e negocimit për shumicën parlamentare.
Në këtë takim, i cili u mbajt në zyrat e Partisë Boshnjake në Podgoricë, në emër të kësaj parti morën pjesë: nënkryetarët Osman Nurkoviç dhe Kemal Purishiç, drejtori politik Suljo Mustafiç dhe deputeti i ardhshëm Ervin Ibrahimoviç.
Koalicioni “Shqiptarët të vendosur” u përfaqësua nga kryetari i Forcës, Nazif Cungu; nënkryetari Genci Nimanbegu; kryetari i Alternativës Shqiptare, Gjergj Camaj; dhe kryetari i Unionit Demokratik të Shqiptarëve, Mehmet Zenka.
Iniciativa Qytetare Kroate u përfaqësua nga: Marija Vucinoviç, Kryetare e HGI dhe Adrian Vuksanoviç, si deputet i partisë. /tesheshi.com/
