Presidenti i Autoritetit Palestinez, Mahmoud Abbas, është shtrënguar ta paralajmërojë presidentin e ardhshëm të SHBA-së për pasojat e një zhvendosjeje të mundshme të ambasadës amerikane nğ Izrael nga Tel-Avivi në Jerusalem.
Në një letër zyrtare të dërguar Trump-it, siç bën të ditur agjencia palestineze e lajmeve Wafa, Abbas-i ka paralajmëruar se një lëvizje e tillë do të kishte ndikim katastrofik mbi procesin e paqes, mbi zgjidhjen me dy shtete, e mbi stabilitetin e sigurinë në rajon.
Mahmoud Abbas u ka dërguar letra dhe fuqive të tjera botërore, si Rusisë, Kinës, dhe BE-së, ku u kërkon të bëjnë ç’është e mundur për ta penguar zhvendosjen në Jerusalem të ambasadës amerikane.
Ndërkohë që statusi i Jerusalemit mbetet ende i debatueshëm, palestinezët e shohin zhvendosjen e mundshme si një veprim të njëanshëm. Palestinezët e çmojnë Jerusalemin Lindor si kryeqytet të shtetit të tyre të ardhshëm; Izraeli e deklaron atë si kryeqytetin e vet të pandarë.
Donald Trump e ka përsëritur herë pas here synimin e tij për ta zhvendosur ambasadën amerikanë në Izrael nga Tel-Avivi në Jerusalem. Muajin e kaluar ai zgjodhi David Friedman-in si ambasador të administratës së tij në Izrael; ky i fundit është zotuar ta zhvendosë misionin në Jerusalem. /tesheshi.com/
