Një grup intelektualësh francezë, duke përfshirë edhe nobelisten Annie Ernaux, kanë bërë thirrje që javën e ardhshme të organizohen protesta nga e majta kundër presidentit Emmanuel Macron. Ata pretendojnë se presidenti francez nuk po bën mjaftueshëm për të varfërit në një kohë të inflacionit galopant.
“Emmanuel Macron po përdor inflacionin për të zgjeruar hendekun midis të pasurve dhe të varfërve dhe për të inkurajuar fitimet kapitale në kurriz të të tjerëve”, thuhet në letrën e 69 nënshkruesve – shkrimtarë, regjisorë dhe profesorë universiteti – botuar në Journal Du Dimanche.
“E gjitha është çështje vullneti politik”, shkruhet në artikullin e firmosur nga Annie Ernaux, e cila u shpall fituesja e çmimit Nobel për Letërsinë të enjten.
Peticioni pretendon se qeveria nuk ka bërë mjaftueshëm për të luftuar rritjen e çmimeve të energjisë dhe ka refuzuar të rrisë taksat për kompanitë që po fitojnë para për shkak të inflacionit të lartë.
Nënshkruesit bënë thirrje për t’iu bashkuar protestës së 16 tetorit të organizuar nga partia e së majtës ekstreme France Invincible, e cila formoi një aleancë me partitë e majta më të moderuara këtë vit për të formuar bllokun më të madh të opozitës në Francë.
Protesta, e cila po promovohet si një marshim “kundër kostos së lartë të jetesës dhe mosveprimit klimatik”, vjen në një kohë kur Macron përballet me kundërshtimin e ashpër të sindikatave ndaj reformës së planifikuar të pensioneve dhe greva të shumta nga punëtorët që kërkojnë paga më të larta. /tesheshi.com/
