Disa protestues po mbanin slloganet “Jo islamofobisë – muslimanët do të qëndrojnë këtu”, para një McDonald’s-i në veri të Londrës të shtunën. Kjo pasi një roje sigurie në dyqan i kishte thënë një femre muslimane që ta hiqte shaminë.
Rreth 50 vetë, kryesisht gra muslimane, u bashkuan me protestën e organizuar nga grupi Stand Up To Racism.
Nafisa, njëra prej protestueseve tha: “Kjo është ajo me çfarë përballemi çdo ditë. Ata thonë se ne po terrorizojmë vendin, por në fakt janë ata që po na terrorizojnë ne”.
“Unë personalisht punoj si dado, dhe ne bëjmë punë vërtetë të vështirë, dhe prapëseprapë ata nuk duan të na shohin në rrugë me shami.
“Tani ata nuk duan të na lejojnë as të blejmë ushqim.”
Menaxherja dhe rojet e sigurisë dolën nga dyqani, por u kthyen brenda nga gratë muslimane.
Pas incidentit, një mikeshë e studentes postoi pamjet e rojes së sigurisë duke u ballafaquar me të në Twitter. McDonald’s ka kërkuar falje për incidentin, dhe ka larguar nga puna punëtorin e sigurimit.
Rakhia Ismail është këshilltare në Partinë e Punës për zonën lokale Holloway. “Ju dëgjoni histori të ndryshme në bashkësinë muslimane për gjëra të tilla, por unë vërtetë u trondita kur pashë videon”, tha ajo.
“Nëse nuk do të ishte videoklipi, atëherë njerëzit do të mendonin se kjo është vetëm edhe një tjetër ankesë nga një musliman”.
Ajo shtoi: “Nëse nuk duan hixhabin tonë, atëherë as ne nuk duhet t’u japim atyre paratë tona”.
Aktivistët në protestë kërkuan që McDonald të garantojë se nuk do të përsëriten incidente si ky në të ardhmen.
Kjo është rezultat i islamofobisë që po shtyhet përpara nga shokët e Donald Trump, Theresa May dhe racistët e djathtë. Ayan tha se: “Kjo vjen nga maja, jo nga popullata e përgjithshme. Ata po kthejnë në normale urrejtjen kundër muslimanëve”.
Rakhia tha: “Ne duhet të rrisim ndërgjegjësimin për çështje si kjo, ngase edhe jomuslimanët po na mbështesin”.
Kurse Ayan tha: “Është koha që të flas si një femër me shami, dhe përherë e më shumë gra po ndjehen të sigurta ta bëjnë këtë. Ne nuk jemi të shtypur për shkak të shamisë, ne jemi të shtypur për shkak të islamofobisë”. /tesheshi.com/
