Liderët e partive politike, LSDM, BDI dhe PDSH, mëngjesin e së premtes janë takuar për herë të parë më përfaqësuesin special të Gjermanisë për Maqedoninë, Johanes Hajndëll. Pas këtij takimi kreu i partisë opozitare maqedonase, LSDM-së, Zoran Zaev ka qenë konciz në deklaratën e tij duke thënë se nuk ka asgjë konkrete nga takimi, ngaqë këto janë bisedime fillestare.
Ndërsa nga ana tjetër, kryetari i BDI-së, Ali Ahmeti ka thënë se në këtë takim janë diskutuar shumë çështje në drejtim të tejkalimit të krizës politike në vend.
“Takim shumë i rëndësishëm. Diskutuam për zgjedhjet, Marrëveshjen e Përzhinos, proceset euroatlantike etj. Ne i kemi dhënë qëndrimet e tona për zgjidhjen e krizës, si të kthehet kuvendi. Ia bëmë me dije se ne kemi marrë masa që parlamenti të vendoset në funksion. Dhe, pasi të rikthehet parlamenti hapen shumë çështje për zgjedhje. Kemi diskutuar ekspertë se si ta arrijmë rikthimin e kuvendit. Do t’i kërkojmë të gjitha rrugët”
I pyetur për atë nëse kanë kontaktuar me VMRO-DPMNE-në, Ahmeti tha se: “Ne kemi qenë transparent dhe kemi kontaktu me të gjitha palët, dhe kemi kërkuar të solidarizohemi mbi zgjidhjen e krizës”, ka shtuar Ahmeti.
Ndërkaq, sipas kreut të PDSH-së, Menduh Thaqi, homologu gjerman është pajtuar me të se e vetmja alternativë për Maqedoninë është BE-ja, ndërsa Marrëveshja e Përzhinos ka dështuar, dhe fajtor për këtë janë partitë në qeveri.
Sipas tij, debllokimi i Kuvendit është iniciativë e mirë dhe nëse ka vullnet mund të zgjidhet çështja e krizës politike.
“Debllokimi i Kuvendit është iniciativë e mirë. Mendoj se nëse ka vullnet punët mund të rregullohen. Pika e parë e jona është Parlamenti të nisë me dy dhoma dhe aty shqiptarët të kenë veto për çdo vendim”, ka shtuar Thaçi.
Ndryshe, dje i dërguari special i Gjermanisë, Hajndëll, ka pasur takim edhe me liderin e VMRO-DPMNE-së, Nikolla Gruevski, me ministrin e Punëve të Jashtme Nikolla Poposki dhe me ambasadorin e SHBA-së në Maqedoni, Xhes Bejli. /tesheshi.com/
