Lestëri mund të festojë tanimë. Lestëri feston tanimë! Endrra është kthyer në realitet. Surpriza më fantastike e epokës moderne të futbollit! Një ekip më tepër se modest, që si përparësi të vetën ka që në nisje të kampionatit mosrënien nga kategoria, është sot kampion në vendin nga lindi futbolli.
Premier Liga është kthyer në një premierë të vërtetë. Një premierë që ka për protagonist një ekip si Lestëri, që sezonin pararendës e mbylli në vend të 14-të, e këtë të tanishmin në të parin. Me një trajner si Claudio Ranieri, të shkarkuar në tërë ekipet e fundit ku ka drejtuar.
Lestëri është shpallur kampion i kampionatit anglez pasi Çelsi dhe Totenhemi kanë barazuar mbrëmë 2-2 në “Stamford Bridge”.
Një derbi londinez tërë gjaknxehtësi, me nëntë kartonë të verdhë vetëm për lojtarët e Totenhemit. Vetëm vetëpërmbajtja e gjyqtarit të lojës bëri të mundur që ekipet ta përfundonin me nga 11 lojtarë, ndryshe pati një numër të konsiderueshëm futbollistësh që merituan të ndëshkoheshin me të kuqe.
Çelsi luajti pa asnjë objektiv, por e respektoi gjer në fund garën sportive. Totenhemi, nga ana tjetër,
kishte mundësinë e fundit për të vijuar rivalizimin me Lestërin për titull. Me një alternativë të vetme: i duhej të fitonte!
Vendasit qenë më këmbëngulës në fillim të lojës, por miqtë u treguan të saktë në dy zbritje. Një top i shkëlqyer nga Lamela në minutën e 35-të, dhe Kane nuk e ka aspak të vështirë të shënojë. Pak para mbarimit të pjesës së parë, Heung-Min Son thellon epërsinë në një sulm me të njëjtën logjikë.
Gjithçka u duk e mbaruar, por siç ndodh shpesh në futbollin anglez, kurrë mos thuaj kurrë. Cahill ngushton diferencën në minutën e 58-të. Barazimi vjen nga Hazard shtatë minuta para se të marrë fund loja.
Gjashtë minutat shtesë sjellin veç tension, ndërsa fishkëllima e fundit e gjyqtarit fikson rezultatin 2-2!
Nuk ka më dilemë, Lestëri është kampion i Premier Ligës! /tesheshi.com/
