Duke mohuar që Beogradi të ketë lidhje me sulmin ndaj kanalit Ibër-Lepenc në Zubin Potok, jetik për Kosovën, ndodhur në veriun me shumicë serbe, presidenti Vuçiç bëri viktimën, siç është në traditën e politikës spekullative serbe.
“Dje ka pasur një tentativë për një sulm të ashpër hibrid ndaj vendit tonë. Ne kemi ndjekur me kujdes gjithçka që është komunikuar nga zyrtarët e Prishtinës dhe sponsorët e tyre, por nuk kemi mundur të dëgjojmë shumë fakte”, tha Vuçiç.
Ai pretendoi madje se e di kush e ka kryer sulmin.
“Hetimi më në fund do të tregojë se kush e ka dhënë urdhrin. Kemi informacione dhe kush ka qenë ekzekutori i menjëhershëm. Jemi të hapur për bashkëpunim me të gjithë, me KFOR-in, EULEX-in. Ne jemi absolutisht të hapur për të folur për atë që ka ndodhur”, vuri në dukje Vuçiç.
Ai ka theksuar se nuk do të thotë se sulmi është urdhëruar nga kryeministri i Kosovës, por se kush është përgjegjës do të tregojë hetimet.
“Ne jemi duke bërë hetimet tona, kemi njohuri të caktuara se kush mund të jetë autori, por hetimi më në fund do të tregojë se kush është përgjegjës”, tha presidenti serb. /tesheshi.com/
