Portieri belg i kthyer me shumë bujë te klubi që zotëronte kartonin e tij ka shumë gjasa që të largohet këtë verë.
Antonio Konte, trajneri i ri i londinezëve të Çelsit, që do ta marrë detyrën pas Euro 2016-ës, është shprehur i gatshëm të japë pëlqimin për shitjen e Tibo Kurtuasë.
Ai do të blehej fillimisht nga skuadra belge e Genkut në vitin 2011, për t’u huazuar për tre vite te Atletiko e Madridit, ku shkëlqeu me paraqitjet e tij. Me të në portë, Atletiko fitoi kampionatin spanjoll, Kupën e Mbretit, Ligën e Europës, e arriti gjithashtu në finalen e Champions League-s.
Përveç një paraqitjeje me luhatje në këtë sezon, një arsye më shumë për ta lënë Çelsin është marrëdhënia e tensionuar e Kurtuasë me trajnerin e portierëve. Pamundësia e Çelsit për të luajtur në Champions League në sezonin e ardhshëm është një tjetër shkak për largimin e tij.
Për 23-vjeçarin shtatlartë raportohet të jenë të interesuar Reali i Madridit dhe PSG-ja.
Forster, portieri i Sauthemptonit dhe i kombëtares angleze, mund të jetë zëvendësuesi i belgut në portën e Çelsit. /tesheshi.com/
