Një palestinez u vra nga forcat izraelite, të maskuar si palestinezë, të martën në Ramallah në Bregun Perëndimor të okupuar, disa orë para se Sekretari i Shtetit i SHBA Antony Blinken të mbërrinte në rajon.
Ahmad Jamil Fahd, nga kampi i refugjatëve Al-Amari, u qëllua për vdekje nga një njësi Musta’rubeen, thonë dëshmitarët palestinezë, dhe u la të humbte gjak para se të vinte një ambulancë.
Kjo njësi përbëhet nga izraelitë që maskohen si palestinezë dhe shpesh kryejnë sulme me qëllim arrestimin ose vrasjen.
Sipas një zëdhënësi të Ministrisë Palestineze të Shëndetësisë, Fahd u qëllua me disa plumba nga një distancë e afërt.
Një zyrtar izraelit i sigurisë i tha AFP se gjatë “përpjekjes për arrestim” të “aktivistëve terroristë në Ramallah, një person që i ndihmoi ata u vra nga policia kufitare”.
Por Amin Abu Radaha, një zyrtar i lëvizjes Fahat në Camp Al-Amari, i tha medias palestineze se Fahd nuk ishte ai që izraelitët po kërkonin, por që ai ishte në zonë me miqtë dhe se ai doli nga makina për 20 minuta me qëllim për të blerë ëmbëlsira.
“Kur ai u kthye tek makina, forcat sekrete izraelite e qëlluan atë dhe e lanë të gjakosur,” tha Abu Radaha, i cili shtoi se izraelitët po kërkonin xhaxhain e Fahd, i cili kërkohet nga agjencia izraelite e inteligjencës Shin Bet. /tesheshi.com/
