Shoqëria kosovare është nën shok nga krimi i paimagjinueshëm i vrasjes së 30-vjeçare Liridona Murseli, e cila, siç po zbardhet tashmë, pak ditë pas ndodhi në një rrugë të Prishtinës, ka për porositës bashkëshortin e saj Naim Murseli. Ky i fundit e serviri krimin në Polici si grabitje ndaj tyre, por hetimet e shpejta çuan pikërisht te ai si porositës, ndërsa ekzekutorë kanë qenë dy persona, Granit Plava dhe Kushtrim Kokalla.
Tashmë pritet të zbardhet arsyeja se pse Naim Murseli e donte të vdekur bashkëshorten, edhe nën fëmijësh, duke sajuar një skenar të denjë për filma, por që ra shumë shpejt.
Tashmë, familja e viktimës nga Prishtina kërkon rivarrimin e Liridonës, jo në Gjakovë ku ajo u varros, aty ku ishte e martuar, por në fshatin e saj. Madje familja Ademaj, nga ishte Liridona, ka paralajmëruar dhe një gjakmarrje të mundshme ndaj familjes Murseli.
Interesant në këtë zhvillim është një status i Blendi Fevziut, i cili e ka njohur dikur Naim Murselin dhe është bërë gati për ta ngushëlluar për humbjen e bashkëshortes, pa e menduar apo besuar kurrë se ai mund të qe vetë vrasësi.
“Pak ditë më parë, lexova në mediat online një lajm i cili ishte tejet i trishtë. Një grua e re kishte humbur jetën në sy të dy fëmijëve dhe bashkëshortit në një tentativë grabitjeje në rrugët e Prishtinës. Mu duk një lajm pak i çuditshëm për Prishtinën e cila sigurinë e ka në nivele shumë të larta, por u trondita akoma më shumë kur pashë fotografinë e çiftit. Në krah të gruas së ndjerë, pashë fotografinë e bashkëshortit, i cili ishte një personazh me të cilin sa kujtoj jam përshëndetur diku në një nga hotelet e Prishtinës disa vite më parë.
Më kishte bërë përshtypjen e një njeriu të kulturuar, të sjellshëm që më tregoi se ishte emigrant në Suedi dhe se e donte shumë Kosovën dhe se njihte të gjithë elitën e Kosovës. Kur pashë fotografinë e djalit dhe ndjeva një trishtim tejet të madh tentova t’i gjeja numrin e telefonit për t’i dërguar një ngushëllim për t’i thënë që të bëhej i fortë për të rritur dy fëmijët e mbetur jetimë, për t’u munduar që ata të kishin sa më pak trauma nga vdekja e nënës përpara syve të tyre. Por dje lexova që policia e Kosovës kishte identifikuar si organizatorin të vrasjes së bashkëshortes pikërisht bashkëshortin.
Mbeta tejet i tronditur në radhë të parë sepse njerëz të tillë që duken normalë, por që kanë ndjenja të tilla kriminale janë kaq pranë nesh. Edhe pse policia dhe drejtësia nuk kanë thënë përfundimisht fjalën e tyre ka shumë mundësi që versioni real të jetë ky. Ndaj pyeta veten. Çfarë mund ta bënte një burrë që të vriste bashkëshorten e tij në sy të dy fëmijëve, t’i linte ata me një traumë kaq të madhe, t’i largonte nga jeta një grua, një vajzë të re, e cila kishte menduar të kalonte jetën me të, e cila ishte bashkëshortja e tij, që kishin kaluar ditë të gëzuara dhe të trishtueshme padyshim, që i kishte sjellë në jetë dy fëmijë dhe që shpresonin t’i rrisnin së bashku? Ka shumë pse.
Është padyshim e vështirë të gjesh një arsye, por një gjë është e sigurt. Çdo njeri që kryen një akt të tillë nuk meriton asnjë fjalë tjetër përveçse kriminel. U prehtë në paqe gruaja e re dhe shpresoj që fëmijët ta kalojnë sa më shpejt dhe me sa më pak pasoja këtë dramë”, shkruan Fevziu. /tesheshi.com/
